Albistea entzun

Energia krisia

Bi urtean energia kontsumoa %10 murriztea helburu Frantzian

Neurritasun energetikorako plana aurkeztu du Frantziako Gobernuak, eta jarrera aldaketa eskatu die herritarrei, inor behartu gabe argindar eta gas kontsumoa murrizteko. Berokuntza 19 gradura mugatzea da neurri nagusia.

Elisabeth Borne, Frantziako lehen ministroa, artxiboko irudian.
Elisabeth Borne, Frantziako lehen ministroa, artxiboko irudian. SARAH MEYSSONNIER / EFE Tamaina handiagoan ikusi

Irune Lasa -

2022ko urriak 6 09:30

Ekitaldi handi batean aurkeztu nahi izan du Frantziako Gobernuak bere neurritasun energetikoaren plana; hain zuzen, egitasmoaren helburuak beteko badira funtsezkoa izango dela herritarren jarrera. Gaurkoan behintzat Matignonek «pedagogia eta bultzadak» erabiliko dituela esan du, ez duela inor behartuko. Hori bai, iragarri du energia aurrezten duten etxebizitzek hobariak izango dituztela energia konpainietatik.

Anbizio handiko helburuak ditu neurritasun energetikorako planak: bi urtean herrialdearen argindar kontsumoa %10 murriztea; hots, 50 terawatt-ordu gutxiago erabiltzea, gaur egun 1.600 terawatt-ordu kontsumitzen dituen Frantzian. Aurrera begira, 2050. urterako elektrizitate kontsumoa %40 gutxitzea jarri dute jomugan.

Frantziaren planak antz handia du Espainiako Kontingentzia Planarekin. Biak ala biak datoz negu honetarako Europako Batasunak gas kontsumoa murrizteko herrialdeei emandako aginduaren harira. Baina Frantzian funtsezko garai batean dator.

Lehenbailehen

Neurritasunaren ideiak garrantzi berezia hartzen du orain, negua datorren honetan, Ukrainako Gerrak piztutako krisi energetikoari batu zaionean Frantziako erreaktore nuklearren erdia baino gehiago geldirik egotea. Emmanuel Macronek berak gaur ere dei egin die frantziarrei, eta bereziki enpresei, neurritasunerako pausoak eman ditzaten.

«Nazio osoak %10eko helburu hori betetzea lortzen badu, borondatearekin —ez dago beharrik lege dekretuetarako edo gauza konplikatuetarako— denok mobilizatzen bagara betetzeko, egoera okerrenean ere negua igaroko dugu», esan du. «Hori da gure patuaren jabe egiten gaituena». Macron bera, dena den, ez da neurritasun planaren aurkezpenean izan, Pragan izan behar baitzuen, Europako Komunitate Politikoaren lehen bileran. Macronen faltan, hamar ministrok egin dute hiru orduz luzatu den planaren aurkezpena.

Neurriak

Guztira 60 neurri aurkeztu dituzte. Baina soiltasun energetikorako neurrietan izarra berokuntzarako 19 graduen muga da. Mantra modukoa bilakatuko da Frantziako Gobernuak abiatuko duen kanpaina erraldoian.

Neurri hori hartuko dute, adibidez, Frantziako administrazioan eraikin publikoetako tenperatura 19 gradura mugatuz, hots, aurreko neguetan baino bizpahiru gradu gutxiagora. Etxebizitzetarako 20 eta 19 gradu arteko tenperatura gomendatuko da. Horrek, Gobernuaren arabera, argindar fakturan%5-10 arteko aurrezkia ekar diezaioke kontsumitzaileari.

Horri lotuta, Gobernuak 9.000 euro arterainoko laguntzak eman ditu gas galdarak bero punpekin ordezkatzen dituzten etxebizitzentzat. Berokuntza zentrala duten eraikinetan, berriz, hamabost egunez atzeratuko da haiek pizteko eguna eta beste hamabost egunez aurreratuko da itzaltzeko eguna.

Berokuntzaz gain, administrazioan ur beroa egoteko derrigortasuna kendu egingo da; zerbitzuetako ibilgailuei abiadura muga orduko 130 kilometroetatik 110ra jaitsiko zaie; eta funtzionarioen artean ere telelana bultzatuko dute, laguntzak handituz. Argiterian ere murrizketak izango dira, batez ere gauean.

Saltoki handiek argiteria murrizteko konpromisoa hartu dute, %30 bezeroentzako zabalik dauden orduetan eta %50 itxita daudenean. Gauez eten egingo dute airearen berriztapena, eta neoizko iragarkiak itzaliko dituzte itxita dauden bitartean.

Igerileku publikoetan gradu bat jaitsiko dute uraren tenperatura, eta jacuzzi eta saunak gutxituko dira, baita haien ordutegia ere. Eski estazioetan, erremonteen abiadura eskiatzaile kopurura moldatuko da.

Jarrera

«Jarrera aldaketa» eskatu du Agnes Pannier-Runacherrek, Trantsizio Energetikorako ministroak: «Gure aitona-amonek ondo egiten zutena egin. Zentzuko neurriak dira». Mobilizazio orokorra aipatu du ministroak, eta argitu ez diela ahaleginik eskatuko «jada neurritasun behartuan bizi diren frantziarrei».

«Neurritasuna ez da bizitzeari uztea, neurritasuna ez da desazkundea», argitu du Pannier-Runacherrek. «Oinarria zentzutasuna da, planetaren zerbitzura, beroketa globalaren kontra eta gure independentzia energetikoaren alde».

Klima larrialdiari erantzuteko neurritasun energetikoa orain are beharrezkoagoa bilakatu dela esan du Elisabeth Borne lehen ministroak. «Gerrarekin, larrialdiarekin, trantsizio energetikoarekin, neurritasuna beharra bihurtu da».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Kontratu mugagabeek gora egin dute iaz, baina lanaldi prekarioenetan

Olatz Silva Rodrigo

ELA sindikatuaren arabera, lan erreformaren lehen urtean Hego Euskal Herrian sinatutako kontratuen %76 aldi baterakoak izan dira. Aldizkako kontratu finkoak 5.545 izatetik 59.220 izatera igaro dira.

Onkologikoko garbitzaileak, lehen greba egunean. ©ELA Sindikatua

Hogei eguneko grebari ekin diote Gipuzkoako Onkologikoko garbitzaileek

Iñaut Matauko Rada

Onkologikoaren ondoko errepidea ordu erdiz moztu dute protesta batean. Kaleko garbitzaileek baino %25 gutxiago irabazten dutela salatu dute.

Gasteizko Eroski supermerkatuko irudi bat. ©Jaizki Fontaneda / FOKU

Inflazioak %5,8ra egin du gora urtarrilean

Iñaut Matauko Rada

Erregaiak garestitu izanak handitu du batez ere inflazioa, nahiz eta oinarrizko elikagaien prezioek behera egin duten, BEZaren jaitsieragatik.

Nissan eta Renaulten logoak, Bruselan, autoen erakuketa batean ©STEPHANIE  LECOCQ

Nissanek eta Renaultek euren arteko aliantza berritu dute

Maddi Iztueta Olano

Akordioan jasotakoaren arabera, aurrerantzean Nissanen kapitalaren %15 izango du Renaultek. Orain arte, horren %43 zuen.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...