Zalantzak eta zurrumurruak uxatu ditu EAJk. Arratsalde bakarrean iragarri ditu Gipuzkoako ahaldungaiaren, Arabakoaren eta Gasteizko alkategaiaren izenak: Eider Mendoza, Ramiro Gonzalez eta Beatriz Artolazabal.
Izen dantza ibili da Gipuzkoan azken egunetan, jakina baitzen Markel Olano egungo Gipuzkoako ahaldunak ez zuela karguan errepikatuko, eta EAJk emakume bat proposatuko zuela haren ordez. Aurreratu zuen berripaper honek aukera gehien Mendozak zuela, eta atzo arratsaldean baieztatu zuen Gipuzkoako Buru Batzarrak. Bi ezaugarri nabarmendu zizkion hautagaitza arrazoitzean: batetik, «gaitasun profesionala eta politikan eta erakundeetan eskarmentua» izatea; eta, bestetik, «EAJko taldearen sendotasuna» duela, «euskal lurralde gisa Gipuzkoako aurrerabidea bultzatzeko» eta «gipuzkoarren ongizatea eragiteko proiektu politikoa betetzen jarraitzeko, garapen ekonomikoan, justizia sozialean eta burujabetza politikoan oinarrituta». Gipuzkoako Foru Aldundiaren bozeramailea da egun Mendoza. Hala da 2019tik. 2001 eta 2011 bitartean EAJko legebiltzarkide izan zen Gasteizen, eta, urte horretatik aurrera, batzarkide izan da Gipuzkoan.
Jakin-mina zegoen EAJren Gasteizko alkategaia nor izango zen jakiteko ere; are, goizean Gorka Urtaranek iradoki ostean ez zuela karguan jarraituko. ETBko Egun on, Euskadi saioan egindako elkarrizketan esan duenez, «ohorea eta pribilegioa» da Gasteizko alkatea izatea, baina ulertzen du «albo batera egiteko garaia ere iristea». Arratsaldean bilera egin ostean jakinarazi du Arabako Buru Batzarrak Beatriz Artolazabal Eusko Jaurlaritzako Berdintasun, Justizia eta Gizarte Politiketako sailburua izango dela alkategaia. Alkate ez, baina zinegotzi izana da Gasteizen Artolazabal, 2000 eta 2007 artean. GHorren ostean, Gasteizko Santiagoko ospitaleko Ekonomia eta Finantza zuzendari izendatu zuten, eta Osakdietzako Ekonomia eta Finantza Zerbitzua zuzendu zuen gero. 2015ean batzarkide izendatu zuten Araban, baina urtebete iraun zuen, eta sailburu da ordutik.
Ahaldungai izateko, berriz, egungo bera proposatu du EAJk: Ramiro Gonzalez. 2015etik da Arabako ahaldun nagusia, eta 2007tik, batzarkidea.
Batzar Nagusietako lehendakarigaiak ere aurkeztu zituen EAJk: Xabier Ezeizabarrena Gipuzkoan, eta Irma Basterra Araban.
