Azkenaldian, etengabeak dira Israelgo Armadaren eskuetan hildako palestinarrei buruzko albisteak. Aurtengoa, jada, 2015. urtetik Palestinako gatazkan izan den urterik bortitzena da: Israelek 137 palestinar hil ditu. Azkenekoa, bart, Zisjordania okupatura sartzeko kontrolgune batean. PAN Palestinako Aginte Nazionalaren arabera, Habes Abdul-Hafez Rayan izena zuen, eta 54 urte zituen. Ramallahtik gertu zegoen herrixka batekoa zen.
Israelgo soldaduen arabera, gizonak eraso egin zion agente bati: lehenik, autoarekin harrapatu zuen, eta, ondoren, aizkora batekin zauriak egin zizkion. Orduan egin zion tiro militarrak. Ospitaleratu egin behar izan dute.
Esan bezala, gaurkoa ez da gertakari bakartu ba; azkenaldian nabaria da tentsioa eskualde horretan. Pasa den astean, adibidez, Israelgo Armadak hiru palestinar hil eta 22 zauritu zituen Zisjordanian asteartean, eta beste bi hil zituen ostiralean.
Hori dela eta, PAN Nazio Batuen Erakundeari eta giza eskubideen aldeko nazioarteko erakundeei «berehala» esku hartzeko eskatzen ari zaie. Salatu dute «gerra krimenak» egiten ari dela Israel. Hainbat manifestazio ere izan ziren joan den astean Zisjordanian.
