Sanchezek EH Bilduri: «Ez zarete gu baino ezkertiarragoak»

Herritarren Segurtasunerako Legearen erreforma eta Etxebizitza Legea «ez atzera ez aurrera» daude Espainiako Kongresuan, tramitatze fasean ez direlako aurrerapausoak eman, Mertxe Aizpurua EH BiIlduko Kongresuko bozeramaileak salatu duenez, eta «badaude gehiengo nahikoak» legegintzaldia amaitu aurretik lege horiek aldatzeko eta onartzeko. Horregatik, Aizpuruak konpromiso horiek «betetzeko» esan dio Madrilgo Kongresuan Espainiako presidente Pedro Sanchezi.

EAJ, EH Bildu, PSOE, UP, ERC eta JxC alderdiek bilera batzuk izan dituzte azken egunetan, hain zuzen, urtea amaitu aurretik akordio bat lortzeko mozal legea-ren erreformaren inguruan, baina akordioa ez dago oso gertu itxuraz. Ez atzera ez aurrera dago erreforma hori, eta Etxebizitza legea ere bai, Aizpuruk gogoratu duenez, eta «blokeo» hori egiteari uztea exijitu dio Sanchezi; hauteskunde garaiko promesak «betetzeko» astia baduela gogorarazi dio, horretarako «premia» dagoela.

«Gobernu progresista batentzat, oinarrizko bi eduki dira; egiten ez bada, milioika pertsonaren etorkizuna hipotekatuko da, eta baliteke zurea eta zure gobernuarena ere hipotekatzea», ohartarazi dio Espainiako Gobernuko buruari koalizio abertzaleko kideak; «soilik eskuinak ateratzen dio etekina promesak ez betetzeari eta eskubideetan aurrera ez egiteari».

Sanchezen erantzuna

Gobernuburuak Ministro Kontseiluari erreparatu dio, eta haren promesak bete direla adierazi du. Espainiako Gobernuak bi lege horiek Kontseiluan onartu dituela gogoratu du, eta gaineratu «orain taldeen txanda» dela, haiei dagokielako adostea «parlamentuan tramitatzen ari diren arauak». Hori esanda, ezkertiarragoa nor den eztabaidan sartu da Sanchez. «Agian ez gara ezer blokeatzen ari; kontua da ez gatozela bat gainontzeko talde parlamentarioekin, baina horrek ez du esan nahi gu baino ezkertiarragoak zaretenik».

Sanchezek garbi esan du, halaber, PSOE ez datorrela bat beste talde batzuek egiten duten «gerturatzearekin» mozal legea-ren erreformari dagokionez. «Oreka leku bat» aurkitu beharko dutela esplikatu du Sanchezek, eta «beste aurrerapen batzuk» onartzeko ere adostasun bera lortu beharko dela erantsi du.

Aizpuruak erantzun argia eman dio ondoren Sanchezi: «Ez dugu denborarik: bada garaia erabakitzeko lege hauek onartu nahi dituzun hitzeman zenuen terminoetan». Azken hilabeteotan sarritan esan diote EH Bilduri «ezinezkoa zela» ezartzea gobernuari eskatu dizkion neurriak, koalizio abertzaleko bozeramaileak azaldu duenez; bada, azkenean, eskaera horiek onartu direla gogoratu du. «Fortuna handien, bankuen edo konpainia elektrikoen gaineko zerga ezartzea, argindarraren prezioa mugatzea... ezer ez zen posible, gure bultzadarekin posible bihurtu genuen arte».

Orain, Etxebizitza Legea onartzeko beharra bere gain hartzeko esan dio EH Bilduren Kongresuko eledunak Espainiako Gobernuari, eta mozal legea «behingoz» indargabetzeko: «Egin ezazu, eta, ez izan zalantzarik, bide horretan lanean jarraitzeko prest aurkituko gaituzu».