EHZk 15.000 euro emanen dizkio Lurzaindiari

Irailaren 21ean egin zuten biltzar nagusian erabaki zuten festibalaren antolatzaileek aurtengo edizioko etekinen zati bat laborantza lurren defentsan lan egiten duen elkarteari ematea.

EHZko eta Lurzaindiako kideak, Kanboko Marieneako lurretan. EHZ
Ekhi Erremundegi Beloki.
2022ko azaroaren 3a
11:47
Entzun

Euskal Herria Zuzenean elkarteko kideek jakinarazi dute aurtengo festibaleko etekinetatik 15.000 euro Lurzaindiari emanen dizkiotela. Irailaren 21ean egin zuten biltzar nagusian erabaki zuten laborantza lurren defentsan lan egiten duen elkartea laguntzea. Arbonako (Lapurdi) Berroetako okupazioa, Kanboko (Lapurdi) Marieniako lurrak laborantzarako izaten segi dezaten eginiko borroka, eta hainbat laborarik eta militantek egunerokoan egiten duten itzalpeko lana aipatu dituzte, besteak beste, erabakia esplikatzeko.

«Euskal Herriko aktualitatean, eragile garrantzitsua da Lurzaindia», azaldu du EHZk agiri batean. «Sortu zenetik, egitura honek ahalbidetu du hainbat laborantza lur espekulaziotik babestea, laborariei birbanatuz. Elkartearen xedea, hazten gaituen lurra defendatzea da, eta, horretarako, laborantzako aktibitate iraunkorra eta kalitatezkoa garatzen duten proiektuak sustengatzen ditu, lurraren eskuragarritasuna hobetuz».

Lurzaindiaren ekintzetatik harago, elkarteak defendatzen duen balio bat azpimarratu nahi izan du EHZk: «lurra denena dela ulertzea». Honela diote agirian: «Egun, Euskal Herrian eta kanpoan ere, laborantza lurra merkatu logika kapitalista batean saltzen da, eta gutxiengo batek – horretarako baliabideak dituztenek – 'inbertsio finantzario' gisa ikusten dute, trukerako balio gisa, etorkizuneko etekinak segurtatzeko. Aldiz, Lurzaindiaren lanak aurkako logika segitzen du, laborantza lurrak eskaintza eta eskaeraren logiketatik atera, eta manera kolektiboan kudeatu, hazten gaituen lurrak bere funtzioa gal ez dezan, interes orokorrak interes pribatuen gainetik jarriz». Horiek horrela, EHZko kideek oroitarazi dute edozeinek lagun dezakeela Lurzaindia emaitza bat eginez edo bere mobilizazioetan parte hartuz.

1996an sortu zenetik, EHZren helburuetako bat izan da bere balioak dituzten elkarte eta mugimendu sozialak sostengatzea. Urteetan zehar, laguntza ekonomikoa eman izan die hainbat kolektibo eta proiekturi, eta Euskal Herrian ziren borroka bat baino gehiagoren bozgorailu ere bilakatu izan da, bai hiru eguneko festibalaren bidez, baina baita urte guziko jardunaren bidez ere. «EHZk biharko Euskal Herriaren eraikuntzan parte hartu nahi du, bere heinean», berretsi dute.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.