Osakidetzak iragarri du probak egingo dizkiela Kabiezesko (Santurtzi, Bizkaia) 400 adin txikikori, ikusteko behar bezala txertatu ote dituzten.
Agiri baten bidez adierazi dutenaren arabera, irailean jakin zuen Osakidetzak litekeena zela osasun etxe horretatik pasaturiko haur askori txertoa behar bezala jarri ez izana. Geroztik dabiltza probak egiten, haurrek immunitatea behar bezala garatu ote duten ikusteko.
Eusko Jaurlaritzako Osasun Sailak azaldu duenez, espedientea zabaldu diote adingabeko horien txertaketaz arduratu zen erizainari.
Urrian bi multzotan txertaturiko 50 bat gaztetxo aztertu zituzten, eta, ondorioztatu zutenez, txanda bateko haur gehienek ez zuten behar bezalako immunitaterik.
Horregatik, gazte horiei eta multzo bereko gainerako guztiei txertoa jartzea erabaki dute. 400 inguru dira. Osakidetzako arduradunek esan dute datozen egunetan jarriko direla harremanetan gazteon sendiekin, egoera azaltzeko eta ordua emateko.
Osasun agintariek adierazi dute susmoa ez dela zabaldu osasun etxe horretan txertaturiko gazte guztietara. Edonola ere, horien sendiekin ere harremanetan jarriko da, azalpenak emateko.