Albistea entzun

Gerra Ukrainan

Moskuk oraindik erabakitzeko du zerealen esportazioen ituna luzatu nahi duen

Kremlinek esan du aztertzen ari dela akordioa funtzionatzen ari ote den. Lavrovek jakinarazi du laguntza eskatu diotela NBEri Errusiaren elikagaien eta ongarrien kanporako salmenta errazteko.

Ukrainatik irten ziren ontzietako batzuk, Istanbul parean (Turkia), joan den urriaren 22an
Ukrainatik irten ziren ontzietako batzuk, Istanbul parean (Turkia), joan den urriaren 22an ERDEM SAHIN / EFE Tamaina handiagoan ikusi

Ander Perez Zala -

2022ko azaroak 3

Laboreen esportaziorako akordiora itzuli eta biharamunean, Errusiak ohartarazpen bat helarazi die itun hori adostu zuten beste aldeei: oraindik ez du erabaki hitzarmena luzatzea nahi duen, aztertzen ari baita kanporako salmententzat —zerealentzat eta ongarrientzat— ere onuragarria izaten ari den.

Akordioa Ukrainak eta Errusiak adostu zuten, joan den uztailaren 22an, NBE Nazio Batuen Erakundearen eta Turkiaren bitartekaritzari esker; hilaren 19an da amaitzekoa, baina bada hori luzatzeko aukera, sinatzaileetako inork kexarik edo arazorik jakinarazten ez badu. NBE eta Ankara luzapenaren alde agertu dira, baita Ukraina ere, eta, printzipioz, Moskuren baiezkoa falta da ituna berritzeko.

«Luzapenaren inguruan erabaki bat hartu aurretik, akordioaren eraginkortasunaz ebaluazio orokor bat egin behar dugu», azaldu du gaur Kremlinen bozeramaile Dmitri Peskovek, eta gehitu du hitzarmen horretara itzultzeak ez duela «zertan esan nahi» ituna hilaren 19tik aurrera ezartzen jarraitu nahi dutenik. Ukrainaren bermeak jaso ondoren erabaki zuen Moskuk, atzo, zerealen esportazioen akordioan berriz ere parte hartzea, Peskovek zehaztu duenez, hori Turkiaren bitartekaritzari esker lortu delako. «Turkiaren parte hartzea izan da konfiantzarako faktore nagusia», Kremlinen bozeramailearen arabera.

Atzo bertan, Vladimir Putin Errusiako presidenteak ohartarazi zuen Errusia itunetik aterako dela Ukrainak Moskuri aurkezturiko bermeak urratzen baditu; hau da, Itsaso Beltzeko itsas korridorea «helburu militarretarako» erabiltzen badu, batez ere Errusiako armadaren itsasontziei eraso egiteko.

Errusia akordiora itzuli zenetik, zazpi ontzi atera dira Ukrainatik. Horietako hiru atzo irten ziren, eta Txinara, Italiara eta Herbehereetara joango dira, Istanbulgo Koordinazio Zentrotik pasatu ondoren; beste hirurek gaur abiatu dute bidea, Espainiara, Omanera eta Txinara iristeko. Zentro horrek emandako datuen arabera, beste 120 bat ontzi Ukrainako portuetan daude, noiz atera zain; denera, uztail amaieratik hona 426 zamaontzi atera dira herrialde horretatik, eta 9,7 milioi tona zereal garraiatu dituzte hainbat herrialdetara.

NBEren idazkari nagusi Antonio Guterresen arabera, operazio horiek munduko 100 milioi lagun pobreziatik «salbatu» ditu. Ukrainak ere positibotzat jo du, bere esportazioak erraztu dituelako, baina Errusiak zalantzak helarazi ditu ia hasiera-hasieratik, Mendebaldeko hainbat estatu eta erakundek ezarri dizkien zigor ekonomikoetatik babesteko ez duelako erabateko onurarik sumatu bere zerealen eta ongarrien kanporako salmentetan —esportazioak ez dira zigor horien parte, baina zeharkako kalteak eragin dizkio, Moskuren arabera—.

Horren ondorioz, Peskovek hitz egin aurretik, Sergei Lavrov Errusiako Atzerri ministroak NBEri laguntza eskatu dio bere herrialdearen esportazioak errazteko: «Oraindik ez dugu emaitzarik ikusten auzi horretan. Egoera laster konpondu beharra dago».

Beste 214 preso trukatuko dituzte

Ukrainak eta Errusiak adostu dute gerrako beste 214 preso trukatuko dituztela, Denis Puxilin Donetskeko Herri Errepublikako buruzagiak Telegram bidez jakinarazi duenez.

Hirugarren trukea litzateke, gaur gauzatuko balitz; aurrekoa joan den urriaren 29an egin zuten, Puxilinen arabera, 50 atxilotu aldatu zituztenean —gehienak bi armadetako kideak ziren—. Urriaren 17an ere antzeko erabakia hartu zuten, eta, kasu horretan, 220 militar trukatu zituzten.

Bestalde, IAEA Energia Atomikoaren Nazioarteko Agentziak jakinarazi du ez duela topatu «aitortu gabeko jardun nuklearrik» Ukrainan. Herrialdeko hiru eremu aztertu ditu, azken asteetan Errusiak Ukrainari leporatu baitio «bonba zikinak» erabiltzea.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Emakume bat burua estalita, atzo, Teherango kaleetan. ©STRINGER / EFE

Mobilizazioei eusteko eskatu dute Iranen, Moralaren Polizia desegin dutela zabaldu ostean

Edu Lartzanguren

Datozen hiru egunetan manifestazioak eta grebak egitera deitu du oposizioak. Gobernuak, ordea, ukatu egin du krisia eragin duen Polizia taldea sakabanatu izana.

Macron eta Putin prentsaren aurrean, joan den otsailaren 7an Moskun egindako bileraren ondoren. ©EFE

Macronek eskatu du Errusiaren segurtasun bermeak aintzat hartzeko

Igor Susaeta

Frantziako presidenteak elkarrizketa batean adierazi duenez, Putinek gerraren amaiera negoziatzea onartzen baldin badu, aintzat hartu behar da NATO «bere ateetaraino heltzeko duen beldurra»
Karakalpakstango 22 ekintzaileren kontrako epaiketaren hasiera, joan den astelehenean, Uzbekistango Bukhara hirian. ©BERRIA

Karakalpakstango protesten epaiketa hasi du Uzbekistanek

Gorka Berasategi Otamendi

Hogei urte arteko zigorrak eskatu dituzte 22 auzipetuen kontra. Manifestariek salatu zuten presidenteak eskualde autonomoaren subiranotasuna ezabatu nahi zuela konstituzio erreforma batekin

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.