IRUÑEKO UDALA
Herritarren Segurtasuneko zinegotziaren dimisioa eskatu dute EH Bilduk, PSNk eta Geroa Baik
Oposizioak salatu du Javier Labairuk (Navarra Suma) bi udaltzaini buruzko «mespretxuzko iruzkinak» egin zituela.
Iruñeko Udaleko Herritarren Segurtasunerako zinegotzi Javier Labairuren dimisioa eskatu dute EH Bilduk, PSNk eta Geroa Baik, bihar Presidentetzako batzordean eztabaidatuko duten idatzi baten bitartez. Oposizioko alderdiek salatu dute iragan osteguneko osoko bilkuran Labairuk «mespretxuzko iruzkinak» egin zituela bi udaltzainaren aurka: «Iruñeko Udalari lan arloko bi auzibide irabazi dizkioten bi udaltzainen aurka eginiko mespretxuzko iruzkinak dira. Gure ustez, funtzionarioon aurka eginiko deskalifikazioen eta beren lanari buruz zabaldutako zalantzen ostean, Labairu jauna ezin da zerbitzu horren arduradun izan, frogatu baitu ezin dituela sailaren helburuak bete eta ez duelako erakutsi udaltzainei zor dien babesik eta errespeturik».
Dimisio eskaeran, oposizioko taldeek gogorarazi dute epaitegiek «bi epai irmo» kaleratu dituztela bi udaltzain horien alde, «Labairuren kudeaketak kalte larriak eragin zizkielako». Hortaz, EH Bilduren, PSNren eta Geroa Bairen irudiko, «agente horiek gutxiesteak eta euren gaitasun profesionala zalantzan jartzeak erakusten du Navarra Sumako agintariak ezin dituela sailaren helburuak bete, eta, hortaz, dimisioa eman behar duela».
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
