Barakaldoko (Bizkaia) gizarte taldeek eta hainbat sindikatuk Amaia Egaña gogoratu dute, hil zeneko hamargarren urteurrenean, hiri horretako justizia jauregiaren aurrean. 2012ko azaroaren 9an bere buruaz beste egin zuen, kaleratu behar zutenean, kendu zioten etxebizitzatik salto eginda.
Hamar urte bete dira Barakaldon Amaia Egañak bere buruaz beste egin zuenetik, etxetik botatzera joan zitzaizkionean. @BerriOtxoak eta @argitan_baraka elkarteek eta herriko sindikatuek agerraldia egin dute, salatzeko ordutik 2.000 familia baino gehiago etxegabetu dituztela. pic.twitter.com/F8fOCY8ZjN
— Maite Asensio Lozano (@MAsensioLozano) November 9, 2022
Ekitaldiaren antolatzaileek salatu dutenez, azken hamar urteotan 2.027 familia etxegabetu dituzte Barakaldon bakarrik. Gaineratu dute larrialdi egoeran dauden familiei laguntzeko zerbitzuetan eginiko murrizketek zaildu egin dutela egoera.
Ekitaldia hauek antolatu dute: Argitan emakumeentzako aholkularitza zentroak, pobreziaren aurkako Berri-Otsoak plataformak, eta ELA, LAB, ESK, Steilas, CGT eta CNT sindikatuek.
Azaldu dutenez, hirian lau familia ari dira pairatzen arazo hori, batez beste, eta horietako %87k alokairuan zuten etxea. Horietako batzuek gela bakar bat zuten errentan, familia osoarentzat.
«Etxegabetzeen aurkako protokoloa ezartzeko eskatzen dugu», adierazi dute, eta gogoratu dute hori indarrean jarri zutela Egañaren heriotzaren ostean, 2013. urtean. Protokolo horren arabera, gizarte zerbitzuek «berehalako erantzuna» eman behar diete halako egoeretan daudenei, eta «gizarte alokairuko etxebizitza bat eskuratzea bermatu». «Egiazko inplikazioa» eskatu diete erakunde publikoei. Arazoak «pertsona zaurgarrienei» eragiten diela azaldu dute: besteak beste, andreei. Gogoratu dute etxebizitza «oinarrizko eskubidea» dela, eta herrian asko daudela hutsik.
"Egiazko inplikazioa" eskatu diete erakunde publikoei. Izan ere, 2013ko eta 2019ko protokoloak ez dira betetzen ari, eta horrek "pertsona zaurgarrienei" eragiten die, besteak beste, andreei. Gogoratu dute etxebizitza "oinarrizko eskubidea" dela, eta herrian asko daudela hutsik. pic.twitter.com/YqL8wmmvVX
— Maite Asensio Lozano (@MAsensioLozano) November 9, 2022
Arartekoak eta nazioarteko justiziak eta erakundeek gaiaren inguruan emaniko ebazpenak aintzat hartzeko eskatu diete erakundeei.
Amaia del Campo Berasategi (EAJ) buru duen Barakaldoko udal gobernuari eskatu diote «atzera egiteko larrialdi laguntzak murrizteko politikan». Horrez gain, gizarte alokairua bultzatzeko eta udal etxebizitza gehiago prestatzeko eskatu dute, kaleraturiko familiak berehala aterpetzeko.