Hamabi puntu arbel batean idatzita. Atzotik Emaginek antolatuta Donostian egiten ari diren (Ez) amatasunak ikuspegi feministatik jardunaldien sinopsia dira, nolabait ere, hamabi puntu horiek. Atzo solaserako aukera eman zitzaien andreei, eta gogoeta horietan jasotako ideien emaitza dira hamabi puntu horiek; hamabi «korapilo» direla nabarmendu dute antolatzaileek, eta horien gaineko gogoeta sustatu nahi dutela orain. Gogoetara horretarako oinarriak jartze aldera, gaur puntu horien gainean hausnarrean jardun dute jardunaldietara bildutako andrazkoek.
Hona zein diren eztabaidagai izan dituzten hamabi «korapiloak», antolatzaileen hitzetan jasota. Bat: «Iruditeria berriak". Horren gainean hainbat galdera proposatu dituzte antolatzaileek. «Nolako erreferentziak behar ditugu? Nola indartu erreferentzia positiboak? (amatasunak, gurasotasunak, izeba biologiko eta ez-biologikoak, sareak...)!». Bi: «Mugimendu feminista eta hazkuntza prozesuak nola uztartu?» Hiru: «Erditzen diren gorputzen beharrak». Lau: «Gizonen absentzia». Bost: «Bakardadearen eta indibidualizazioaren aurrean, kriantza komunitarioa». Sei: «Ez-amatasun kontzienteak». Zazpi: «Erreprodukzio biologiko eta hazkuntza prozesuetan, zer utzi nahi dugu publikoaren/merkatuaren esku?». Justu horixe da eztabaida talderik gabe geratu den «korapilo« bakarra. Zortzi: «Nola aurre egin epai sozial, barne epai eta erruduntasun sentimenduei?» Bederatzi: «Gure desioak eta hautuak problematizatzen.» Hamar: «Denboraren antolaketa». Hamaika: «Mugimendu feministan zein espazio behar ditugu honi buruz eztabaidatzen segitzeko?» Hamabi: «Gurasotasun bolleroak».
Desira, eta beste
Aurretik, solasaldi bat egon da, eta desira izan dute hizpide bertan, beste behin. Hain zuzen, Uzuri Aboitizek, moderatzaile lanetan, zehaztu du ama izateko desira ez dela zerbait «naturala eta purua»: «Sistemaren baitan sortzen dugun desira bat da». Bat etorri da Lore Lujanbio ikerlaria ere: azaldu zuenez, «botere mekanismoek» arautzen dute desira, hura ekoiztu eta naturalizatuz, «patriarkatuaren eta kapitalismoaren mesedetan».
Marta Luxan demografian doktoreak, berriz, demografiaren arlotik begiratu dio gaiari: «Ugalkortasunaren ardura emakumeei egozten zaie; natalitatea jaisten denean, adibidez». Iosune Fernandez antropologoa ere bertan izan da, eta amatasun eredu ezberdinak ikusaraztearen garrantziaz aritu da: «Normatiboak ez direnak, eta ertzetan daudenak: ama bakarra izatea, aniztasun funtzionala duten haurren ama izatea, edo ama eta migrantea izatea, adibidez».
Metxi Bogino ikertzaile eta laugarren hizlariak, ordea, «ezinezko amatasunetan» arreta jarri beharra azpimarratu du: «Ama izan ezin direnak, hori onartzen dutenean, eta beraien identitatea hortik berreraiki behar dutenean».
Arratsalderako ere egitarau betea dute antolatua. Mireia Delgadok helduentzako narrazio bat aurkeztuko du, Amatasunaren itzal literarioak goiburupean solastatuko dira Uxue Apaolaza, Iratxe Retolaza, Danele Sarriugarte eta Arantxa Urretabizkaia. Mursegok amaituko du jardunaldia.
