Albistea entzun

AEB-ak

Demokratek AEBetako senatuaren kontrolari eutsiko diote

Bart baieztatu dute Catherine Cortez Masto demokratak irabazi duela Nevadan. Ordezkarien Ganberarako bozetan, errepublikanoak doaz aurretik.

Nevadako Las Vegas hiriko hauteslekuak, asteartean.
Nevadako Las Vegas hiriko hauteslekuak, asteartean. CAROLINE BREHMAN / EFE Tamaina handiagoan ikusi

Mikel Elkoroberezibar Beloki - Paulo Ostolaza -

2022ko azaroak 13

Asteartean egin zituzten agintaldi erdiko hauteskundeak AEB Ameriketako Estatu Batuetan, eta, horien bidez, Ordezkarien Ganbera eta Senatuaren herena berrituko dituzte. Sarritan gertatu da Etxe Zurian dagoen alderdia gutxiengoan geratzea Kongresuan. Are, Bigarren Mundu Gerraren ostean, bitan baino ez da gertatu estatuburuaren alderdiak irabaztea agintaldi erdiko bozak. Aurtengoa, ordea, hirugarren aldia izango da.

Bart baieztatu dute Nevada estatuko Clark eskualdean Catherine Cortez Masto hautagai demokrata gailendu dela; ondorioz, Alderdi Demokratak AEBetako Senatuaren kontrolari eutsiko dio. Euskal jatorriko Adam Laxalt errepublikanoa zen beste hautagaia.

Horrek mesede egingo dio Joe Biden AEBetako presidenteari, nabarmen. Izan ere, errepublikanoek behe eta goi ganberen kontrola lortuko balute, asko zailduko litzaioke Bideni agintaldiaren azken zatia. Horregatik da garrantzitsua demokratentzat Senatuaren kontrolari eustea: Ordezkarien Ganberan gehiengoa errepublikanoek lortuko balute ere, Bidenek alde izango du Senatua.

Demokratek hauteskunde kanpainan esan zuten Kongresuan errepublikanoak gailenduz gero demokrazia bera egongo dela jokoan. Donald Trump presidente ohiaren babesean aurkeztutako eskuin muturreko hautagai errepublikanoek irabazteak adieraziko luke sistema politikoa bera eta hauteskundeak ere zalantzan jarri izan dituzten ordezkariak egongo direla erabakiguneetan.

Ordezkarien Ganberako eserlekuen banaketan, errepublikanoak doaz aurretik, baina Bidenen alderdiak aukera handiak ditu Senatuaren kontrolari eusteko.

Goi ganberan ehun eserleku daude guztira; oraingoz, demokratek 50 eserleku lortu dituzte, eta errepublikanoek 49. Georgiako aulkia dantzan dabil oraindik.

Nevadakoarekin eskuratu ditu 50 eserleku Alderdi Demokratak, eta, ondorioz, Senatuaren gaineko kontrolari eutsiko dio. Izan ere, bi alderdien arteko berdinketa egonez gero —bakoitzak 50 aulki izanez gero—, AEBetako presidenteordeak dauka azken hitza legeak onartzeko orduan; kasu honetan, Kamala Harris demokratak. Georgiako aulkia errepublikanoek irabaziz gero gertatuko litzateke hori. Georgiakoa demokratek irabaziko balute, gehiengoa izango lukete, eta ez lukete Harrisen azken hitzaren beharrik izango goi ganbera kontrolatzeko.

Georgia, abenduan

Georgian, bigarren itzulian erabakiko dute Senatuko aulki horretan nor eseriko den, bi alderdi nagusietako hautagaietako batek ere ez baitu lortu botoen %50 biltzea, 2020an gertatu bezala. Abenduaren 6an egingo dute bigarren bozketa.

Ordezkarien Ganbera nola osatuko den jakiteko, denbora gehiago beharko dute AEBetan. Oraingoz, errepublikanoak gailentzen ari dira lehian, 211 eserleku eskuratu baitituzte jada; demokratek, berriz, 201. Guztira 218 diputatu lortzen dituenak izango du behe ganberaren kontrola, eta hemezortzi daude jokoan. Botoen zenbaketa amaitzeko, egunak —eta, agian, asteak— beharko dituzte, baina, inkesten arabera, Alderdi Errepublikanoak lortuko du Ordezkarien Ganberako gehiengoa. Demokratei alde oso handia ere ez diete aterako, aurreikuspenen arabera.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©KETTY MARCELO LOPEZ

«Perun hil egiten gaituzte; diktadura zibiko-militar batean bizi gara»

Mikel O. Iribar

Buruzagi indigenak azaldu duenez, Castilloren atxiloketa «bidegabeak» ez ezik, Perun duten krisi sozialak eta arrazakeriak ere eragin dituzte egungo protestak: «Ez dugu amore emango».
Peruko Kongresuak ez du onartu hauteskundeak abendura aurreratzea

Peruko Kongresuak ez du onartu hauteskundeak abendura aurreratzea

Ander Perez Zala

Hauteskundeak aurten egitearen alde agertu dira, egunotan, ordezkaritza duten alderdi gehienak, baina 54 parlamentarik egin dute alde, eta 68k kontra
<b>Sudango manifestari talde bat, armadak protesten kontra erabili duen indarkeria salatzeko mobilizazio batean, iazko ekainean, Khartumen.</b> ©ELA YOKES / EFE

Afrika eremu gatazkatsuagoa bihurtu da azken hamarkadan

Gorka Berasategi Otamendi

Kontinenteak zenbait hobekuntza egin ditu sustapen ekonomikorako alor batzuetan eta giza garapenean. Adituek ohartarazi dute azken urteetako lorpenak arriskuan daudela

Krisi politikoa eragin du Italian preso anarkista baten gose grebak

Mikel O. Iribar Arantxa Elizegi Egilegor

Alfredo Cospitok ehun egun baino gehiago daramatza protestan. 30 urteko zigorra du

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...