Albistea entzun

Euskaraldia

Abiatu da Euskaraldia

Euskal Herriko bost hiriburutan hasiera ekitaldiak egiten ari dira. Hainbat kontzertuk ere girotuko dute gaua.

Mintzodromoa Donostiako Bulebarrean, gaur goizean.
Mintzodromoa Donostiako Bulebarrean, gaur goizean. Jon Urbe / Foku Tamaina handiagoan ikusi

Julen Otaegi Leonet -

2022ko azaroak 17

Euskaraldiaren hasieraren atarian, Euskal Herrian motorrak berotzen hasi dira. Arratsalderako egitarau oparoa antolatu dute bost hiriburutan, baita herri eta eskualde askotan ere. Baionan, Bilbon, Donostian, Gasteizen eta Iruñean ahobizi eta belarriprest mordoa elkartu dira. Hasiera ekitaldiak ez ezik, kontzertuak eta emanaldiak ere izango dira hiriburuetan. 19:30ean, hiriburuetan txapa janzte bateratua egin dute parte hartzaileek.

Iruñean, jendea biltzen hasia da Zentral aretoan; txapak nonahi ikus daitezke. Topaguneko eta euskalgintzako kideez gain, ordezkari politikoak eta gizarte eragileak dira aretoan. Iñaki Sagardoi Euskaraldiaren Nafarroako koordinatzaileak hartu du hitza: «Euskaraldia elkarlanean egiten den egitasmo erraldoia da, baina zuek zarete herrietan, bailaretan, eskualdeetan, auzoetan euskarari hauspoa ematen diozuenak».

Baionan ere, Zizpa gaztetxearen goxotasunean elkartu dira ahobizi eta belarriprestak. Ekitaldiaz aparte, gero pintxo poteaz ere gozatu dute euskal giroan.

Lehen, goizaldean, Euskalerria Irratia belarriak goxatzen hasi da. Metropoli Forala saioa eskaini du Iruñeko Laba aretoan. Bertan izan dira Topaguneko eta administrazio publikoetako ordezkariak eta ahobizi eta belarriprestak. Oskar Zapata Euskaltzaleen Topaguneko Nafarroako zuzendariak ezin hobeki azaldu du Euskaraldiaren bezperako giroa: «Ilusioa sumatzen da herri eta txoko guztietan». Donostian ere, goizetik eguerdira bitartean, hiru mintzodromo antolatu dituzte, euskaltegietako ikasleak hitzekin ekiten hasteko.

Bihartik aurrera hasiko da benetan Euskaraldia. Hiriburuetako gaurko ekitaldiez gain, herri eta auzo bakoitzak beren egitarau propioa osatu dute datozen bi asteetarako. Kontzertuak, emanaldiak, poteoa, aurkezpenak... denetarik antolatu dute.

Ahobizi eta belarriprest

Azaroaren 18tik abenduaren 2ra bitartean, euskararen erabilera hauspotzera deitu dute antolatzaileek. Hala, aurki hasiko da euskaraz aritzeko garaia bai herrietan, bai kaleetan eta etxean eta txoko guztietan. Izan ere, Hitzez ekiteko garaia da Euskaraldiaren aurtengo leloa. Halaber, datozen asteotako esperientziak ere partekatu ahal izango dira sareetan, #HitzezEkiteko traola erabilita eta @euskaraldia Twitter kontua aipatuta.

Euskararen aldeko ariketa kolektibo bat da Euskaraldia, eta herritarrek hizkuntza ohiturak aldatzea du xede, euskararen erabilera handitzeko. Bi rolen artean aukeratu behar dute parte hartzaileek: ahobizi eta belarriprest. Ahobizi direnek konpromisoa hartzen dute euskara ulertzen dutenekin euskaraz mintzatzeko, eta ezezagunei lehen hitza beti euskaraz egiteko. Belarriprestak, berriz, euskaraz hitz egiteko gai izan ez arren haiengana euskaraz zuzentzea nahi dutenak dira.

Pertsonek ez ezik, mota guztietako eragileek ere parte har dezakete Euskaraldian, ariguneak sortuz. Euskaraz lasai hitz egiteko guneak dira, izan entitate barruan edo izan entitateak herritarrekin duen harremanean.

Hona hemen arratsalderako egitaraua, hiriburuz hiriburu:

Baiona (Zizpa gaztetxea)

18:00 Ate irekiera

18:30 Musika eta giroa

19:00 Ekitaldiaren hasiera eta txapa ezartzea

19:45 Pintxo potea

20:00 Ixabe taldearen emanaldia

Bilbo (Bilboko Alondegia)

19:10 Ekitaldiaren hasiera. Nerea Mazo eta Patxo Telleria arituko dira aurkezle lanetan

19:30 Txapa jartzea

19:40 Inun eta Yogurinha Borovaren kontzertua (Ibarrekolanda Institutuko lagunekin batera)

Donostia (Bulebarra)

18:00 Musika eta dantza herrikoia, Donostiako Udalaren Musika eta Dantza Eskolak antolatuta

19:00 Mirari Martiarena eta Idoia Torregarai umoristen saioa

19:25 Euskaraldiaren mezua irakurtzea, Tanya de la Cruzekin, Iñaki Salvadorrekin eta Sua Enparantzarekin

19:30 Txapa janzte bateratua, eta, jarraian, Mugan taldearen emanalditxoa

Gasteiz (Jimmy Jazz aretoa)

18:00 Ipurbeltz kale antzerkia

19:00 Ekitaldi nagusia

19:45 DJ Malandroren emanaldi ibiltaria

21:00 Lenoir eta Miceren kontzertua Hala Bedi tabernan

Iruñea (Zentral aretoa)

18:45 Ate irekiera

19:00 Ekitaldi nagusia: Olaia Intziartek, Broken Brothers Brass Bandek eta DJ Reimyk girotuko dute ekitaldia

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Lezetxikiren Lagunak taldekoek ateratako argazki batzuk, Lezetxikoko galeria suntsituan. ©LEZETXIKIREN LAGUNAK

AHTaren tunel batek Lezetxikin kalteak egin dituela salatu dute

Xabier Martin

Aztarnategi baliotsuaren gertuko galeria bat suntsitu du tunelak, espeleologo batzuek dokumentatu dutenez. Euskal Herriko giza aztarnarik zaharrenak topatu dituzten lekua da Arrasateko koba
Osasun langile bat, atzo, Nafarroako Ospitale Unibertsitarioaren kanpoaldean. ©IÑIGO URIZ / FOKU

Osasunbideko gehiengo sindikalak grebara joko du, Sindikatu Medikotik bereiz

Ion Orzaiz

LAB, SAE, UGT, ELA, Afapna eta CCOOk hilaren 15erako egin dute deialdia. «Osasun publikoaren kalitatea eta lan baldintzak» hobetzea daukate xedetzat. Negoziazioa gobernuaren eta Sindikatu Medikoaren artean egin izana salatu dute
Bidaiari batzuk, Donostiako autobus geltokian. ©GOTZON ARANBURU / FOKU

Ibilbide luzeko autobusak doakoak dira jada ohiko bidaiarientzat Hegoaldean

Jone Arruabarrena

Berme bat ordaindu beharko da, eta gutxieneko bidaia kopuru bat egin
Euskal Herriko mugimendu feministaren agerraldia, atzo, Gasteizen. ©ENDIKA PORTILLO / FOKU

Zaintza sistema «eraldatzeko» mobilizatuko da mugimendu feminista

Edurne Begiristain

Lehen mugarria Martxoaren 8an ezarriko du Euskal Herriko mugimendu feministak. Zaintza «erantzukizun soziala» bilakatzea izango du helburu borroka dinamikak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...