Albistea entzun

Gerra Ukrainan

Errusiak esan du «negoziatzeko prest» dagoela, bere interesak «bermatzeko»

Ukrainako armadak adierazi du bere tropetako 13.000 soldadu eta 6.000 zibil hil direla gerra hasi zenetik. Haur ugariri hezkuntzarako eskubidea urratu dietela salatu du NBEko batzorde batek.

Vladimir Putin Errusiako presidentea, gaur, Moskun.
Vladimir Putin Errusiako presidentea, gaur, Moskun. EFE Tamaina handiagoan ikusi

Mikel Elkoroberezibar Beloki -

2022ko abenduak 2

Joe Biden AEB Ameriketako Estatu Batuetako presidenteak atzo adierazi zuen Vladimir Putin Errusiako presidentearekin «hitz egiteko prest» dagoela, «Ukrainako gerra amaitzeko interesa adierazten badu». Gehitu zuen «oraindik» ez duela interesik adierazi. Gaur, Errusiako Gobernuak erantzun egin dio Bideni. Putin «negoziatzeko prest» dagoela nabarmendu du Dmitri Peskov Errusiako Gobernuaren bozeramaileak, baldintza batekin: «Gure interesak bermatzeko».

Peskovek gaineratu du AEBek «oztopatu» egiten dutela gerraren amaiera, «ez dutelako aitortzen» Ukrainako Luhansk eta Donetsk eskualdeak «Errusiaren esku daudela». Biden eta Putin ez dira elkartu otsailaren 24an Ukrainako gerra hasi zenetik.

Ordutik hona, Ukrainako armadako 10.000-13.000 soldadu hil dira, Volodimir Zelenski Ukrainako presidentearen aholkulari nagusi Mikhailo Podoliakek gaur adierazi duenez. Nabarmendu du Ukrainako armadaren «estimazio ofiziala» dela, eta gehitu du 6.000 zibilek galdu dutela bizia gerra hasi zenetik. Abuztutik lehen aldiz plazaratu du gaur Ukrainako Gobernuak hildako kopuruaren estimazioa.

Hildakoez gain, giza eskubide ugari ari dira urratzen Ukrainako gerran. Hala nabarmendu izan du Ukrainaren inguruko Ikerketaren Nazioarteko Batzorde Independenteak. Martxoan sortu zuen batzorde hori NBE Nazio Batuen Erakundearen Giza Eskubideen Batzordeak, Ukrainako gerran gerta litezkeen giza eskubideen eta nazioarteko zuzenbidearen urraketak ikertzeko. Batzordea hamargarren misioa ari da egiten Ukrainan azaroaren 28tik. 2023ko martxoan emango dute ikerketaren ondorio guztien berri, baina gaur Kieven egin duten prentsaurrekoan nabarmendu dute haurren eskubideak urratu egiten dituztela Ukrainako gerran. Ohartarazi dute egunetik egunera haurren osotasun fisikoaren bortxaketak areagotzen ari direla Ukrainan.

Gerra ikasgelara heldu da

«Hainbat amak esan digute beren haurren hezkuntza eskubidea urratuta dagoela», adierazi du Jasminka Dzumhur Ukrainaren inguruko Ikerketaren Nazioarteko Batzorde Independenteko kideak. Batetik, adierazi du hainbat ikastetxe suntsituta daudela operazio militarrak egiten dituzten eremuetan, eta, ondorioz, haurrak ezin direla eskolara «fisikoki» joan.

Bestetik, Dzumhurrek ohartarazi du ikaskuntza mantentzeko alternatibak ere oztopatuta daudela. COVID-19aren pandemiaren ondorioz ezarritako ikaskuntza prozesua izan da —online bidezkoa— ikastetxea suntsitua duten haur askok eskolara joateko izan duten modu bakarra, baina sistema hori ere «arriskuan» dagoela salatu du batzordeko kideak. Ukrainako hainbat eremutako —Kieveko, esaterako— elektrizitate eskasiak zaildu egiten du haurrek ikasten jarraitu ahal izatea, Dzumhurrek azaldu duenez.

Bestalde, batzordeak salatu du Errusiaren jarrera ez dela lankidetza bultzatzekoa. «Errusiako Federazioarekin kontaktua izaten ahalegindu gara, baina ez dugu erantzunik jaso. Horregatik, frogak biltzea zaila da», adierazi du batzordeko kideak.

Ukrainako gerran sexu indarkeria jasan duten emakumeen testigantzak jasotzeko «zailtasuna» izan dute batzordekoek, Dzumhurrek nabarmendu duenez: «Askok ez dute publikoki kontatu nahi bizi izan dutena».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ponsati Generalitateko kontseilari ohia, Puigdemont presidente ohia, Puig kontseilari ohia eta Boye abokatua, atzo, Bruselan. ©LEO RODRIGUEZ / EFE

Erbesteratu katalanak Espainiaratzea baztertzeko irizpideak, zehaztuta

Gorka Berasategi Otamendi

EBko Justizia Auzitegiak ebatzi du Belgikak Espainiako justiziaren «gabezia sistemiko bat» frogatu behar duela haren euroagindu bat baztertzeko. Ez da guztiz lerratu, ez independentistekin, ez Llarenarekin
AEBetako gerra abioi batzuk, Ozeano Atlantikoko hegazkinontzi batean. ©STEPHANIE LECOCQ / EFE

Ukrainara gerra abioiak bidaltzearen aurka agertu da, oro har, Mendebaldea

Igor Susaeta

Borrokarako hegazkinak Kievi entregatzea aztergai dute, baina aliatuek ez dute jarrera bateraturik. AEBek eta Berlinek ezetz esan dute
Carles Puigdemont (erdian) Luxenburgoko auzitegiaren epaia baloratzen, gaur, Europako Parlamentuan, inguruan Clara Ponsati, Gonzalo Boye, Lluis Puig eta Toni Comin dituela. ©Berria

Erbesteratu katalanek ezingo dituzte Belgikaren argudioak erabili Llarenaren euroaginduak baztertzeko

Gorka Berasategi Otamendi

Europako Batasuneko Justizia Auzitegiak ebatzi duenez, batasuneko estatu kide batek ezin dio uko egin beste kide baten euroagindu bati, frogatu ezean azken horrek sistematikoki urratzen dituela eskubideak.

AEBetako F-16 hegazkin batzuk ariketa militarrak egiten Hego Korean ©EFE

Ukrainara gerra abioiak bidaltzearen aurka agertu da, oro har, Mendebaldea

Igor Susaeta

Auzia mahai gainean dago, baina Mendebaldeak ez du jarrera bateraturik. Macronen arabera, hainbat aldagai hartu beharko lirateke kontuan borrokarako hegazkinak entregatzeko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.