Asko hitz egiten da Olentzeroren jatorriaz, baina gutxi, ordea, Olentzeroren panpina egiteko tradizioaz. Eskuz egindako irudiak ere ikusten dira abenduaren 24an kalean, baina etxeetan ohikoagoak izaten dira erositakoak. Horretaz oharturik, Dantzan.eus atariak Olentzero panpinak egiteko gonbita egin du aurten: «Gabon hauetarako, egin zuen Olentzero, eta bidali argazkiak [email protected] emailera, eta argitaratu sarean (Twitterren, Instagramen...) #OlentzeroDantzan2022 traolarekin. Gainera, bideoak grabatzen badituzue Olentzerorekin zaudetela kantuan, oraindik eta hobe!».
Olentzero Dantzan ekinaldiaren hirugarren aldia izango da aurtengoa, 2020koaren eta 2021ekoaren ondoren. «Tradizioan era guztietako Olentzeroak ezagutu dira. Leitzan, esaterako, aspalditik Olentzero panpinak egin izan dira etxeetako eta baserrietako atarietan eta leihoetan jartzeko. Olentzero ehiztari, arrantzale, dantzari, txistulari, jostun, artzain, sorgin, ikazkin... Batzuetan zarpail, beste batzuetan dotore, gizon edo emakume, edo genero marka argirik gabe!», dio deialdian Dantzan.eus-ek.
Aurten, abenduaren 20an amaituko da parte hartzeko epea. Aurreko urteetan bezala, parte hartu dutenen zerrenda abenduaren 23an eskegiko dute webgunean. «Sor ditzagun gure Olentzero propioak. Katean ekoizten diren Olentzero panpina klonikoen ordez, egin dezagun gure etxeko, eskolako, lantokiko edo ikasgelako Olentzero. Bakoitzak bere Olentzero, forma eta itxura bereizgarriekin».
