Albistea entzun

Osasungintza

Langileek ez dute «hurbiltzeko borondaterik» ikusten Osakidetzaren partetik

Berriro ere elkarretaratzea egin dute Donostia ospitalearen aurrean. Iñigo Urkullu lehendakariak «lasaitasunera» dei egin du, eta adierazi du Osasun Saila eta Osakidetza plan estrategiko bat lantzen ari direla: «Uste dut egoera azkenean bideratuko dela; badut konfiantza».

Donostia erietxearen aurrean egindako protesta.
Donostia erietxearen aurrean egindako protesta. Goka Rubio / Foku Tamaina handiagoan ikusi

Arantxa Iraola -

2022ko abenduak 9

Astebete igaro da Donostialdeko ESI Erakunde Sanitario Integratuko zuzendari kudeatzaile Itziar Perez eta Idoia Gurrutxaga zuzendari medikoa kargugabetu zituztenetik, eta egoera ez da oraindik baretu. Berriro ere, sendagileek elkarretaratzea egin dute Donostia ospitalearen eskaileretan, eta kexu agertu dira, esan dutenez, Osakidetzak ez dielako erantzun elkarrizketarako egin dituzten deiei. «Hurbiltzeko borondaterik» ez dute ikusten Osakidetzaren zuzendaritzaren partetik.

Elkarretaratze motza izan da, berriro ere, Donostia ospitaleko atariko eskaileretan egin dutena. Gaur astebete Donostia-Beterriko ESIko arduradun bi kargugabetu zituztela jakin zutenean egin zuten lehena, erietxeko zerbitzuburu hainbatek deituta, erabakiengatik protestan. Gaur osasun langileen kezka oraindik bizi-bizi dagoela adierazi dute. Hamarnaka izan dira batutakoak protesta hasi berritan, ehundik gora ziren amaitu denerako. Txalo zaparrada luze batekin amaitu dute protesta.

Adolfo Lopez de Muniain eledunak hartu du gero hitza. Bertan batutako kazetariei, aurrena, asteazkenean erietxeko zerbitzuburuek deituta egin zen agerraldiaren berri emateko ohar bat eman die. Hor batzen dira beren aldarri nagusiak. Azken orduaren berri eman du gero.

Aurrena-aurrena, plazaratu dituzten aldarriak hedatzen jarraitu nahi dutela esan du. Eragozpenak argiak dira, ordea. Esaterako, adierazi du erietxe barruan bilerak egiteko trabak jartzen hasi zaizkiela orain: «Arazoren bat dago, ea bideratzea lortzen den». Bestetik, Osakidetzako zuzendaritzara eta Eusko Jaurlaritzako Osasun Sailera elkarrizketak hasteko asmoz egin dituzten deiek ez dute erantzunik izan. «Astebeteren ondoren, harritzekoa da», azaldu du. «Ez dugu haien partetik hurbiltzeko borondaterik ikusten».

Horiek horrela, aldarriak gaur goizean bertan erietxeko kudeatzaile berriari aurkeztu nahi dizkiote, bere bulegoan. «Geratzen zaigun bide bakarra hori da», azaldu du Lopez de Muniainek. Hortik ere ez dute jaso, ordea, oraindik elkarrizketarako deirik; zerbitzuburu bakan batzuek deitu dituzte, eta, jakinarazi duenez, bilera horiek «hotzak» izan dira, eta «tentsioa» egon da. Baina jarraitu egin nahi dute ahaleginean.

Aldarri «orokorrak»

Aldarri asko «osasun erakunde osoari dagozkionak» direla gogoratu du Lopez de Muniainek, «orokorrak», erietxeko goi karguek konpondu ezinak, baina harreman joriak behar dituzte ospitaleko buruekin, laneko martxa onerako.

Goizero 08:15ean elkarretaratzeak egiten jarraitzeko asmoa dute. Osasun erakundeko talde gero eta gehiagoren atxikimendua lortzen ari direla esan du medikuen ordezkariak. Zerbitzuburuek hasi zuten protesta, baina gero eta langile talde gehiago ari dira bat egiten. Lopez de Muniain bera zerbitzuburua da Neurologian. Beste langile batzuentzat «lehen lerroan» jartzea zailagoa dela onartu du, «errepresalien» beldur direla, eta nahigabea erakutsi du horregatik.

Aldarriok erietxe honetan goratu direla esan du, baina askoz ere zabalagoa dela osasun sistemaren funtzionamenduaren inguruko kezka.

Urkulluk «lasaitasunera» dei

Iñigo Urkullu lehendakariak «lasaitasunerako deia» egin die herritarrei Donostia-Beterriko ESIan pizturiko gatazkaren aurrean: «Helburua partekatzen dugu, hau da, osasun arreta, horren kalitatea eta azpiegituren antolaketa hobetzea. Horretan ados gaude; beraz, ez dut aparteko kezkarik».

Gogorarazi du Osasun Saila eta Osakidetza plan estrategiko bat lantzen ari direla, eta Donostia-Beterriko ESIko arduradunak arazoak konpontzen saiatzen ari direla: «Uste dut egoera azkenean bideratuko dela; badut konfiantza», esan du.

Hala ere, Urkulluk iradoki du afera honetan «beste interes eta helburu batzuk» egon daitezkeela, eta Osasun sailburu Gotzone Sagarduiren dimisioa eskatzen duten adierazpenen aurrean erantzun du horrelako eskaerak «maiz» egiten direla.

Donostia-Beterriko ESIko bi arduradunen kargugabetzeaz, normaltzat jo du Urkulluk: «Planteamendu estrategikoaren inguruan elkarrenganako konfiantzarik ez dagoenean, logikoa da konfiantza falta hori horrela konpontzea». Edonola ere, Urkulluren ustez, horrek ez du esan nahi ESIren berregituratze prozesuan «arazorik» dagoenik: «Aitzitik, Donostia ospitalearen erreferentzialtasuna handitzea planteatzen ari gara», azaldu du.

Asko balio du irakurri duzun albiste/artikulu honek. Talde baten lanaren emaitza da.

Albiste hau zuri helarazteko eta talde honek bere lana baldintza egokietan egin dezan, BERRIAk ezinbestekoa du zure sostengua.

Zure babes ekonomikoarekin, aldi hau kontatzeko funtzioa betetzen jarraitu nahi dugu: kazetaritza konprometitu, kalitatezko eta independentea egiten.

Albiste gehiago

Ione Belarra Espainiako Gobernuko Eskubide Sozialen eta 2030 Agendaren ministroa, Espainiako Senatuan. ©FERNANDO ALVARADO / EFE

Animalien Ongizaterako Legea indarrean sartu da Hegoaldean

Mikel Elkoroberezibar Beloki

Animalia domestikoak abandonatzen dituztenak zigortu ahalko dituzte legearen bidez, eta debekatuta egongo da animaliak ikuskizun publikoetarako erabiltzea, baina salbuespen asko izango dira.

EH Bilduko Ikoitz Arrese Eusko Legebiltzarrean. ©RAUL BOGAJO / FOKU

Hezkuntza Akordioarekin «leial» izateko deia egin die EH Bilduk alderdiei

Gotzon Hermosilla

Asteartean amaituko da lege egitasmoari zuzenketak aurkezteko epea. Eusko Legebiltzarrean abiaraziko da eztabaida, eta «lege on bat» erdietsi nahi du EH Bilduk

LAB sindikatuko emakumeen batzarra, atzo, Oiartzunen (Gipuzkoa). ©GORKA RUBIO/ FOKU

LABek eskatu du zaintza lanak eremu pribatutik ateratzea eta «duintzea»

Edurne Begiristain

Sindikatuko 200dik gora emakume Oiartzunen bildu dira, greba feminista antolatzeko. «Zaintza komunitarioa» aldarrikatu dute

 ©Biel Aliño / EFE

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...