Hirutik hiru. Elordik eta Zabaletak 22-10 irabazi zieten atzo Peio Etxeberriari eta Rezustari, eta garaipen horrekin Binakako Txapelketako sailkapenaren buru dira bakar-bakarrik. 456 pilotaka jo zituzten pilotariek, eta Elordi nabarmendu zen lauen artetik. Binakako Txapelketa jokatuko zuela jakin zuzenetik, albiste onak besterik ez da ematen Elordi. Atzo hamahiru tanto egin zituen: sakez bat, jokoan besteak. Gehiago ziren Etxeberriaren jarraitzaileak frontoian, eta ondo jokatu zuen partidaren lehen zatian, baina lehen atsedenaldiaren ondoren, partida erabat aldatu zen.
Hirutik hiru!. Zabaleta gidari eta Elordi errematatzen. Gaur #Larraintzar-ren 22-10 Peio Etxeberria eta Rezustaren aurka #eskupilotapic.twitter.com/OVVcx9qg7w
— ASPE Pelota (@ASPEpelota) December 9, 2022
Partidak bi zati izan baitzituen. Markagailua 11-10era iritsi zen arte, parez pare lehiatu ziren bi bikoteak. Gero, ordea, 11 tanto egin zituzten erreskadan Elordik eta Zabaletak. Aurrelariak gero aitortu zuenez, jokoa aldatzea erabaki zuten partida erdian, eta pauso bat aurrera ematea erabaki zuten: saiatuko zela bera jokoan gehiago sartzen, eta iristen ez bazen, Zabaletak babestuko zuela. Atzelariak joko erakustaldi bat eman zuen, eta nagusitasun horretan Elordik errematatzeko aukerak izan zituen; bereak izan ziren azken zortzi tantoak.
Emaitza horrekin ligaxkako jaun eta jabe dira Elordi ea Zabaleta: hiru partida irabazi dituzte, eta kontrarioek 22 tanto soilik egin dizkiete. Etxeberria eta Rezusta, berriz, sailkapenaren azken postuan dira, hirutik hiru partida galdu ondoren.