Disney Plus plataformak azaroaren hasieran iragarri zuen Kote Cabezudo auzia-ren inguruko dokumental saio bat estreinatuko zuela azaroaren 23an. Lau ordu eta erdiko lanean, Kote Cabezudo salatu zuten hainbat emakumeren lekukotzak jaso zituen Sr. Mono ekoiztetxeak. Preso dago Cabezudo 2018ko udaberritik. Epaiketa aurten egin dute, martxoaren 7tik apirilaren 13ra. 28 urte eta bi hilabeteko zigorra jarri diote. Prozedura judiziala xehe-xehe kontatzen da saioan. Eduardo Mendoza kazetariak zuzendu du dokumental saioa, eta BERRIAren galderei erantzun zien azaroaren 20an.
Iritsi zen azaroaren 23a, baina plataformak ez zuen estreinatu En el nombre de ellas (Haien izenean) dokumental saioa. Disneyk ez zuen inolako argibiderik eman orduko hartan.
Oraingoan ere ez du argibiderik eman Disneyk. Baina, BERRIAk jakin duenez, plataforma horrek ez du estreinatuko Cabezudoren gaineko dokumental saioa. Sr. Mono ekoiztetxeko iturrien arabera, dokumental saioaren eskubideak itzuli dizkio Disneyk ekoiztetxeari. Horrenbestez, Sr. Monok programa saltzea lortuko balu, beste plataforma edo telebista batean estreinatuko litzateke. Eduardo Mendoza saioko zuzendariak BERRIAri esan dio dokumentala beste leihoren batean emitituko dela, eta datozen egunetan jakinaraziko dutela non.
