Amazonek aitortu egin du Europako online salmenten merkatuan duen nagusitasunaz baliatu dela, baita lehiakortasun araudiaren aurka egin duela ere. Europako Batzordea 2019ko uztailean hasi zen AEBetako enpresa teknologikoa ikertzen, Amazonen plataforma erabiltzen duten saltzaileen datu pribatuak enpresak nola erabiltzen zituen ikertzeko. Hala, bi aldeek akordio bat lortu dute: Amazonek ez du isunik jasoko, baina bere plataforman komertzializatzen duten saltzaileen datu pribatuak erabiltzeari utzi beharko dio.
Margarethe Vestager Europako lehiakortasun komisarioak atzo iragarri zuen akordioa. «Amazonek hainbat portaera komertzial aldatu beharko ditu. Aldaketa horiek konpetentziako txikizkarien eta banatzaile independenteen mesederako izango dira, baita kontsumitzaileen mesederako ere», adierazi du Vestagerrek.
Akordioari esker, Amazonek milaka milioi euroko isun bat saihestu du; zehazki, enpresak mundu osoan egindako negozio bolumenaren %10 balio zuen isuna jaso behar zuen. Joan den urtean Italiak 1.128 milioi euro ordaintzera zigortu zuen Amazon, nagusitasunaz baliatzeagatik.
Akordioa sinatu ostean, hainbat neurri hartu beharko ditu Jeff Bezosen enpresak. Lehenik eta behin, saltzaileen eta banatzaileen arteko komunikazioa erraztu beharko du Amazonek, baita banatzaile independenteei erosleekin zuzenean komunikatzeko baliabideak eman ere, datuen babes araudiak errespetatuz; izan ere, banatzaile independenteek ezin dute zuzenean erosleekin hitz egin. Banatzaileen datu babesa ere hobetu beharko du. Azkenik, kexak jartzeko sistema zentralizatu bat sortu beharko du plataformak.
Lehiakortasunari dagokionez, Amazonen saltzen duten komertzializatzaileen datu pribatuak erabiltzeari utzi beharko dio. Bestalde, Buy Box eskaintza programan saltzaile guztiek tratu bera izan beharko dute sailkapeneko posizionamendua egitean. Azkenik, Prime zerbitzuan saltzaileek bidalketak egiteko logistika zerbitzuak nahi duten moduan egiteko aukera izan beharko dute.
AEBetako enpresa teknologiko handiek (Google, Amazon, Meta...) hainbat epaiketa izan dituzte Europan, eta atzo sinatutako akordioak komunitateko merkatuan aritzeko arauak ezarriko ditu etorkizunerako.
Bi ikerketa
Bruselak bi ikerketa egin ditu azken urteetan Amazonen jardunari eta arau hausteei buruz. Lehena 2019ko uztailean hasi zuen, enpresak plataforma erabiltzen duten saltzaileen datu pribatuekin zer egiten zuen jakiteko. Hala, ebatzi zuen Frantzian eta Alemanian Amazonek merkatuan duen nagusitasuna baliatzen zuela, beste saltzaileei kalte eginez. Handik hilabete batzuetara, Bruselak ohartarazi zuen Amazonek datu horiek bere negozioa hobetzeko erabiltzen zituela, lehiakortasunaren araudiaren aurka eginez. 2019ko azaroan hasi zuen bigarrena, eta Batzordeak adierazi zuen Amazonek bere nagusitasuna baliatu zuela Espainian, Frantzian eta Alemanian.
