Goiz-goizetik, ehunka pertsona zain zeuden Vatikanoko Done Petri basilikara sartzeko, Benedikto XVI.a aita santu emerituari azken agurra egiteko. 09:00etan ireki dituzte ateak, eta 19:00ak arte egonen dira zabalik. Bihar eta etzi, berriz, 07:00etatik 19:00etara egonen da basilikara sartzeko aukera. Orotara, 35.000 bisitari inguru egonen direla espero dute.
Ikusi gehiago:Benedikto XVI.a hil da, polemikaz beteriko agintaldia izan zuen aita santu emeritua
Aita santu emeritua zendu berritan, kapera pribatu batean izan dute gorpua, eta han hurbileko jendeak izan du agurtzeko aukera. Basilika ireki baino lehenago, gainera, liturgia pribatu bat egin dute zenbaitek. Giorgia Meloni Italiako gobernuburuak, adibidez, bertan parte hartu du.
Hileta elizkizuna ostegunean izanen da, Done Petri plazan, 09:30ean. 60.000 lagun inguru joango direla uste dute. Bertan izanen dira bai Italiako eta bai Alemaniako –aita santu emerituaren jatorrizko herrialdea– agintariak.
