Emakundek Santanori eskatu dio berdintasun plan bakar bat bidaltzeko

Irungo V. Berdintasun Planaren bi bertsio jaso dituzte Emakunden, eta bakar bat hautatzeko eskatu dio erakundeak Irungo alkateari, gutun baten bidez. Udaleko Berdintasun ordezkari Miren Etxebestek (Elkarrekin Podemos-IU) eman du gaur berria. Adierazi du alkateak eskutitza jaso izana «ezkutatzeko» ahalegina egin duela, baina Emakunderen bidez jakin dutela horren berri, eta horregatik atera nahi izan dutela argitara. Etxebesteren arabera, Emakundek esan du izen bereko bi agiri jaso dituela, eta «behin betikoa» zein den jakin nahi duela. Plana aztertu eta horren gaineko txostena eman behar du erakundeak, eta horregatik egin du galdera.

Elkarrekin Podemos-IUk Eguberrien aurretik eman zuen arazoaren berri, abenduaren 15ean. Udaletxean bertan egindako agerraldi batean Berdintasun ordezkari Miren Etxebestek salatu zuen Jose Antonio Santano alkatea ahalegindu zela hiriko V. Berdintasun Planetik alardearen gaia «ezabatzen», eta dokumentuaren bi bertsio zeudela horregatik.

Etxebestek abenduaren eman zituen argibideen arabera, planaren testua urriaren 27an egin zen Berdintasun Mahaian onetsi zen behin betiko; udal taldeen eta hiriko beste kolektibo askoren «ekarpenak» jasoak dituen dokumentua dela zehaztu zuen, eta jaso beharreko «kontraste guztiak» zituela. Dokumentu horretan tokia dute alardeari buruzko edukiek. Etxebestek kontatu zuenez, behin prozesu hori bukatuta, ordea, alardearen gaineko aipamenak testutik kentze aldera, alkateak «udal arautegitik kanpo» beste dokumentu bat hitzartu zuen talde politikoekin, eta aurrera ateratzea lortu zuen, gainera. PPren eta EAJren babesarekin onartu zen bigarren agiri hori.

Etxebestek agerraldi hartan esan zuen jatorrizko testua bidalia zuela berak Emakundera, eta Santanok ere berak bultzatutakoa bidaltzen bazuen plan beraren bi testu helduko zitzaizkiela. Irmo salatu zuen Etxebestek bigarren agiri hori ontzeko prozesua, jatorrizko dokumentua egiteko prozesua «normaltasun guztiz» egin zela argudiatu baitzuen, eta hortik kanpoko urratsek ez zutela zentzurik.

Gaia aipatu ere egin gabe

Bereizgarritasun hori izan dute orain arte Irunen egin diren berdintasun planek: ez dute inoiz «alardea» aipatu ere egin, hirian igaro hamarraldietan berdintasun faltarekin lotuta egon den arazo nabarmenenetariko bat izan den arren. Urteak daramatzate herritar askok alarde parekide baten alde borrokan, eta udalari eskatzen ari zaizkio egiteko horren aldeko urratsak. Oraindik alkateak ez du hautu horren alde egin inoiz, ordea, eta gutxietsi egin ditu beti alarde parekidearen alde ari diren gizon eta emakumeak; aldiz, beti izan ditu babes keinuak andreak baztertzen dituen desfilearentzat.

Udal gobernuan PSE-EErekin dago Elkarrekin Podemos-IU. Alardearen gaiaren gainean desadostasun agerikoak dituzten arren, gainerako gaietan «oso ados» daudela nabarmendu zuten Elkarrekin Podemos-IUko kideek abenduan egin zuten agerraldian.