Euskal Herriko historia hurbila arakatzeko ez-fikziozko proiektuak saritzen ditu Tene Muika bekak. Debako Udalak eta Elkar argitaletxeak antolatzen dute, eta, aurten jasotako proposamenen artetik, Alaitz Melgar Agirrerena (Barakaldo, Bizkaia, 1984) saritzea erabaki du epaimahaiak —Idurre Eskisabelek, Imanol Muruak eta Cira Crespok osatu dute—. Bere amona Josefa Agirre Etxeberriaren bizitza ikertzeko baliatuko du beka Melgarrek, eta urtebeteko epea izango du horretarako. Ingeles Filologiako gradua eta Berdintasun Masterra ikasitakoa da, eta eskolak ematen ditu Iralen.
1927an jaio zen Josefa Agirre Etxeberria, Azpeitian (Gipuzkoa). Garai hartako neska askok bezala, neskame joan behar izan zuen gaztetxotan, Donostian etxea zuten aristokrata espainiar batzuen etxera. Ingalaterrara joan zen lanera gero, hardun gelditu ezkondu gabe, eta, buru osasuneko gorabeherak tarteko, psikiatrikoan ere egin zituen bolada batzuk. Haren bilobak aurreratu duenez, isilpean gelditzen diren istorio horietako bat argitara ekartzea lortu nahi du liburuarekin.
