Donostiako Artzain Onaren plazan dagoen eraikin batean pitzadurak agertu dira, metroaren lanek zimenduei eragin dietelako», Satorralaia bizilagunen mugimenduak salatu duenez. Gainera, adierazi dute plaza horretako izkinan dagoela eraikina, eta horrek larriagotu egiten duela kaltea: «Plazako izkina arkitektonikoki osatzen duen arkuko harlanduzko piezen mugimenduek eta pitzadurek erakusten dutenez, eraikinaren desengonkortze bat gertatu da metroaren lanek zimenduei eragin dietelako».
Mugimenduak salatu du Donostiako metroaren Erdialdea-Kontxako geltokia eraikitzeko lanen ondorioz gertatu dela pitzadura, horretarako San Martin eta Easo kaleetan erabili diren «metodo erasokorren» ondorioz. Izan ere, azaldu dute eraikuntza proiektuak ohartarazten duela eraikin askoko toki batean dagoela sarbidea eraikitzen ari diren eremua, eta horrek «eraikuntza arrisku handiak» dakartzala.
Horrez gainera, salatu dute urtarrilaren 4an Easo kaleko beste eraikin bateko balkoia erori zela, eta, zergatik erori zen oraingoz argitu ez duten arren, Satorralaiak adierazi du metroa eraikitzeko proiektuan ohartarazi zutela nolako «arrisku larria» dakarren etxe horrentzat San Bartolomeko sarbide kanoia eraikitzeak: «Indusketa lanen eta eraikinaren zapaten mailaren artean dagoen harkaitzezko estalkia 2,8 metrokoa izango da soilik, nahiz eta proiektuan aurreikusten den teorian 7 metroko gutxieneko harkaitz estalkia behar dela halako lurpeko lanak egiteko».
