51 urteko industria behargin bat hil da lan istripu ez-traumatiko batean, Zestoako (Gipuzkoa) Industrias Artzubia enpresan, LAB sindikatuak jakinarazi duenez. Atzo gauean aurkitu zuten enpresako aldageletan, ondoezik. Segituan eraman zuten ospitalera artatu zezaten, eta handik gutxira hil zen.
Harekin, Euskal Herrian aurten jada hiru dira lanean ari zirela hil diren langileak, LAB sindikatuaren zenbaketaren arabera. Iaz, 69 izan ziren hildakoak; horietatik herenak, lan istripu ez-traumatikoek eragindakoak (arazo kardiobaskularrak barne).
«Heriotza ez-traumatikoak ugaritzen ari dira, eta gero eta nabarmenagoa da lanpostu jakin batzuetan laneko arrisku faktoreek istripu hauetan duten eragina», adierazi du sindikatuak. Hala, «neurri eraginkorrak» hartzea galdegin dute, «gero eta intzidentzia handiagoa duen arazo horri aurre egiteko».
Garraiolari bat, larri
LAB sindikatuak beste istripu baten berri ere eman du: Ibarrara (Gipuzkoa) bidean zihoan garraiolari bat topatu zuten atzo bere kamioian, «antza bihotzekoak jota». Erietxera eraman zuten, larri. «Ezinbestekoa da lan istripu ez-traumatikoen harira neurriak hartzea, bereziki sektore jakin batzuetan, non laneko baldintzak eragile argiak diren», gehitu du LABek.