Laugarren urtez antolatu dute Argia aldizkariak eta Baltsan elkarteak Euskal Liburu eta Disko Azoka, Ziburun (Lapurdi). Ekainaren 3an izango da, eta, antolatzaileek adierazi dutenez, azokak orain arte izan dituen ezaugarriak izango ditu aurten ere: euskara hutsezko ekoizpenen azoka izatea, herriko plazan kokatzea eta ekainaren hastapenean egitea, «udaberriko berritasunen eta udako oporren artean». Nolanahi ere, «hobekuntzak» ere ezarri nahi dituzte, hala nola musika gunea, argitaletxeentzako aparkalekua eta kultur programazio aberatsagoa.
Azkeneko azokako datuak ere eman dituzte antolatzaileek. 33 argitaletxe batu ziren azokara —2021ean 23—, eta 1.000 lagun inguru bildu ziren —700 2021ean—. 729 liburu saldu ziren orotara —400 bat 2021ean—, 118 disko, eta 64 kamiseta, zaku eta bestelako.
