Efe albiste agentziak aurreratu duenez, 2010eko hamarkadan Gipuzkoan hainbat emakumeri eraso egin zien gizonari beste espetxe zigor bat ezarri dio Gipuzkoako Auzitegiak, hemezortzi urtekoa. Bi sexu eraso eta bortxaketa delitu bat egiteagatik ezarri diote zigorra; zehazki, eraso horiek 2012. urtean eta 2013. ean gertatu ziren, Andoainen, Tolosan eta Anoetan. Gainera, emakume horiekiko urruntze agindua bete beharko du espetxetik ateratzen denean, eta eraso bakoitzagatik lau eta bederatzi urte bitartean egon beharko du zaintzapean aske. Sexu erasoa jasan zuten emakumeei 12.000 eta 14.000 euroko kalte ordaina eman beharko die, eta bortxatu zuenari, 35.000 eurokoa.
Zigor horiek gizon horri lehendik jarri zizkioten beste biei gehitu zaizkie: bederatzi urteko espetxe zigorra 2015ean Lasarte-Orian neska bat kloroformoarekin lokartzeagatik, eta hamabi urtekoa 2019an Beasainen emakume bat bortxatzeagatik. Azken eraso horren ostean atxilotu zuten bortxatzailea, eta ondoren jakin zuten zazpi urtez Gipuzkoan izan ziren zenbait erasoren atzean zegoela.
Aurreko bi zigorrei helegitea aurkeztu die Espainiako Auzitegi Gorenean, soilik baietz da baietz lege berrian oinarrituta. Orain ezagutarazi den epaia, ordea, lege hori aintzat hartuta eman du Gipuzkoako Auzitegiko 3. Salak. Aipatutako auziez gain, bada erasotzailearen aurkako beste bat, oraindik irekia, bere delitu batengatik, baina instrukzio fasean dago oraindik.
