Realeko eta Bartzelonako jokalariak, Superkopako finalaren ostean, irabazitako dominak mahai batetik hartu eta janzten. Irudi horiek zabaldu dira sare sozialetan, eta haserrea eragin dute zaleen artean. Aurrez ere polemika zegoen RFEF Espainiako Futbol Federazioak emakumezkoen futbolari ematen dion tratuaren inguruan —Espainiako selekzioko hautatzailearen eta jokalarien artean izandako tirabirak tarteko—, eta, atzo gertatutakoa ikusita, matxismoa egotzi diote federazioari berriz ere.
Esta es de las cosas más vergonzosas que he visto. El fútbol femenino profesional merece más. La Supercopa es una competición de la @rfef y nadie de los directivos pudo entregar las medallas. LAMENTABLE pic.twitter.com/DO1as0PQ6Y
— rɘgina (@cule_miss) January 22, 2023
Joan den astean gizonezkoen Bartzelonak eta Real Madrilek Riaden jokatu zuten finaleko sari banaketarekin alderatu dute askok Meridakoa (Espainia). Saudi Arabian, besteak beste, Luis Rubiales federazioko presidentea izan zen jokalariei dominak jartzeko arduradunetako bat.
Federazioaren arabera, protokolo kontu bat izan zen atzokoa. Azaldu duenez, Meridako Romano Jose Fouto estadioko azpiegiturek zaildu egiten dute erakundeetako ordezkariak zelaira jaistea, eta horregatik jaso behar izan zituzten dominak jokalariek beraiek. Errege Kopako finaletan ere gertatu izan da hori, federazioaren arabera. Kopak bai, palkoan jaso zituzten bi taldeetako kapitainek, Bartzelonako Marta Torrejonek eta Realeko Nerea Eizagirrek. Rubialesek berak eman zizkien.
Comparen las dos entregas de medallas en la Supercopa masculina y femenina, de vergüenza lo que ha hecho la @rfef 👇 pic.twitter.com/iXN73ypBMB
— Diego FS (@DiegoFSRB) January 22, 2023
AFEk, Espainiako futbolarien elkarteak, gogor kritikatu du federazioaren jarrera, ohar bidez: «Gutxietsi egin dituzte jokalariak, eta ez diete merezi duten moduan aitortu daukaten meritua. Egun batzuk lehenago, berriz, Saudi Arabian, gure elkarteko kide diren gizonezkoei bestelako tratua eman zieten». Elkartearen iritziz, Meridakoa «errepikatu ezin den irudi lotsagarri bat» izan zen.
AFEk, gainera, esan du sari banaketa ez zela izan baztertzailea izan zen kontu bakarra; besteak beste, salatu du emakumezkoen finalean ez zegoela VAR sistemarik. Gizonezkoenean, bazegoen. Espainiako Gobernuari eskatu dio gertatutakoa kontuan hartzeko.
Nerea Eizagirre atzo, Meridan (Espainia), Superkopako txapeldunordearen garaikurra jasotzen.Reala
Palkoan, Rubialesekin batera, Jorge Vilda Espainiako hautatzailea zegoen. Jakina da haren eta atzoko finala jokatu zuten hainbat jokalariren arteko giroa ez dela oso ona: joan den irailean Espainiako selekzioarekin jokatzeari uko egin zioten hamabost jokalarietatik zazpi zeuden atzo zelaian. Oraingoz, ez dirudi giroak hobera egingo duenik.
