Albistea entzun

Antzerkia

Dramaturgia izango du ardatz Lautan Hiru jaialdiaren bosgarren aldiak

Otsailaren 2an abiatuko da Lautan Hiru antzerki laburren jaialdia Bilboko Zazpikaleetan. Guztira, bederatzi ekitaldi eskainiko dituzte: sei antzezlan, solasaldi taularatu bat, irakurraldi dramatizatu bat eta Ganbila bildumaren aurkezpena.

Lautan Hiru jaialdiaren antolatzaileak, gaur goizean, Bilbon.
Lautan Hiru jaialdiaren antolatzaileak, gaur goizean, Bilbon. OSKAR MATXIN EDESA / FOKU Tamaina handiagoan ikusi

Olatz Enzunza Mallona -

2023ko urtarrilak 24 16:58

«Gogoberrituta eta berrikuntzaz josita» dator aurtengo Lautan Hiru: antzerki txikia, festibal handia jaialdia, Iñaki Mendizabal Euskaltzaindiko komunikazio arduradunaren hitzetan. Aurreko aldietan bezala, antzerkigintza izango da jaialdiaren muina, baina hainbat formatutan. Guztira, bederatzi ekitaldi antolatu dituzte: sei antzezlan, solasaldi taularatu bat, irakurraldi dramatizatu bat eta Ganbila bildumaren aurkezpena. Euskaltzaindiak, Bira kulturguneak, Zazpi Katu gaztetxeak eta Cafe Bar Bilbao tabernak elkarlanean antolatzen dute Lautan Hiru, eta, aurten, berrikuntza gisa, beste eragile bat gehitu zaie: AEKren Kalderapeko kulturgunea. Horiek izango dira, hain zuzen, ikuskizunak taularatzeko bost agertokiak. Gaur goizean aurkeztu dute egitasmoa, Euskaltzaindiaren Bilboko egoitzan.

Jaialdiaren bosgarren aldia da aurtengoa. Izatez, Euskaltzaindiaren mendeurrena ospatzeko ekitaldien barruan antolatu zuten 2019an, eta, emaitzak ikusita, urtez urte egiteko erabakia hartu dute. Aurten, baina, egitarau murritzagoa prestatu dute. «Ekitaldi gutxiago antolatzeko erabakia hartu dugu, kalitatearen mesedetan», azaldu du Andres Urrutia euskaltzainburuak. Hala ere, hasierako helburu berberak dituzte: euskarazko antzerkia indartzea, batetik; antzerkilariei beren lanak erakusteko espazioak eskaintzea, bestetik; eta Zazpikaleetako kultur giroan eragitea, azkenik.

Bi ekoizpen propio

Otsailaren 2an izango da lehenengo emanaldia, eta datozen hiru ostegunetan egingo dituzte hurrengoak: hilaren 9an, 16an eta 23an, hain zuzen. Dramaturgia izango da, gainera, aurtengo ardatz nagusia. «Sarritan, gidoilariak ezkutuan geratzen dira, eta horiengan jarri nahi dugu arreta», adierazi du Mendizabalek.

Berrikuntza gisa, bi ekoizpen propio ere izango ditu aldi honek, lehenengoz: Dramaren komeriak deseraikitzen solasaldi taularatua eta Txizatoki bat eszenatokian antzezlana. Matxalen de Pedrok gidatuko du lehenengoa, eta Aizpea Goenagak, Jokin Oregik eta Eneritz Artetxek parte hartuko dute. «Antzerkigintzaren gakoak azalduko dituzte, modu umoretsu eta jostarian», aurreratu du Mendizabalek. Bigarren ekoizpena, berriz, Patxo Telleriak egin du: «Jaialdirako beren-beregi idatzi du gidoia».

Ekitaldiei dagokienez, askotariko egitaraua prestatu dutela aurreratu dute antolatzaileek. Horien artean egongo da, besteak beste, Cafe Bar Bilbao sariketako aurtengo sariduna: Lutxo Egiaren Hamalau antzezlanaren irakurketa dramatizatua egingo du Mikel Martinez aktoreak. Horrez gainera, aurkezpen bat ere egingo dute: Susa argitaletxeak kaleratzen duen Ganbila antzerki bildumaren inguruan arituko da Oier Guillan.

Era berean, iaz bezala, Ikusle kluba egingo dute aurten ere, EHAZE Euskal Herriko Antzerkizaleen elkartearekin batera. Ikusle talde batek Maren Basterretxearen Igaro antzezlana aztertuko du otsailaren 8an, eta emanaldia hurrengo egunean izango da, Zazpi Katu gaztetxean. Hala, antzerkizaleen bizipenez hitz egiteko espazio bat lortu nahi da.

Jaialdiko bonuak eta sarrerak bihar jarriko dira salgai, Cafe Bar Bilbaon eta Bira kulturgunean. Gainera, bonua erosi dutenen artean, Zazpikaleetan euskara eta euskal kultura sustatzeko opariak zozketatuko dira astero.

EGITARAUA:

Otsailak 2:

- 19:00etan, Txizatoki bat eszenatokian (Patxo Telleria, 40 minutu), Euskaltzaindian.
- 20:00etan, Nire zigilua (Alain Lersundi, 35 minutu), Kalderapekon.

Otsailak 9:

- 19:00etan, Igaro (Maren Basterretxea, 30 minutu), Zazpi Katu gaztetxean.
- 20:00etan, Zuri (Goitibera konpainia: Gaizka Chamizo, Saioa Iribarren, Ander Basaldua; 30 minutu), Bira kulturgunean.

Otsailak 16:

- 19:00etan, Dramaren komeriak deseraikitzen solasaldi eszenaratua (Jokin Oregi, Aizpea Goenaga eta Eneritz Artetxe; 50 minutu), Euskaltzaindian.
- 20:00etan, Hamalau obraren irakurketa dramatizatua (Mikel Martinez, 20 minutu), Cafe Bar Bilbaon.

Otsailak 23:

- 19:00etan, Raska Nazka (Aitor Vinagret, 25 minutu), Euskaltzaindian.
- 19:30ean, Ganbila bildumaren aurkezpena (Oier Guillan), Euskaltzaindian.
- 20:30ean, Daisy Crazy (Pez Limbo konpainia: Josune Velez de Mendizabal eta Ane Gebara), Bira kulturgunean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Joxean Fernandez, Maria Pilar Rodriguez, Isabel Herguera, Izaskun Arandia eta Bingen Zupiria, liburuaren aurkezpenean. ©Jagoba Manterola / Foku

'Euskal emakume zinemagileak' liburua plazaratu dute

Andoni Imaz

Euskal Herriko zinemagintzan «funtsezkoak» izan diren emakumezko zuzendariak ditu ardatz, eta Euskadiko Filmategiak eman du argitara. Maria Pilar Rodriguez ikertzaileak koordinatu du artikulu sorta.

Larunbatean hasiko da <em>Bizirik</em> lanaren aurkezpen bira, Donostiako Dabadaba aretoan. ©BENGO

Nork bere burua barkatu artean

Uxue Rey Gorraiz

Aitor Bengoetxea 'Bengo' musikariak lehenengo lan luzea eman du: 'Bizirik'. Zortzi kantu bildu ditu; hiru kolaborazio tartean. Larunbatean hasiko du kontzertu bira, Donostian.

Inauteri giroan murgilduko du herria festibalak. ©GUILLAUME FAUVEAU

Inauterietako dantzak eta musika batuko ditu Hartzaro festibalak

Berria

Otsailaren 10etik 21era egingo dute Uztaritzeko jaialdia, udaberriari ongietorria emateko asmoz

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...