Literatura

Otsailean egingo dute Lumafest jaialdia Donostian, bigarrenez

Zabalik dago mikrokontakizunak bidaltzeko epea. Otsailaren 9tik 11ra tailerrak eta hitzaldiak izango dira Koldo Mitxelena kulturunean.

Slawka Grabowska eta Amaia Garcia antolatzaileak, Mari Jose Telleria Gipuzkoako Kultura diputatua eta Olatz Osa Elkar argitaletxeko zuzendaria, gaur goizean, jaialdiaren aurkezpenean. JON URBE / FOKU
Naroa Torralba Rodriguez.
2023ko urtarrilaren 26a
13:04
Entzun

Bigarren urtez egingo dute Lumafest jaialdia Donostiako Koldo Mitxelena kulturuneko ganbaran, otsailean. Slawka Graboska eta Amaia Garcia aritu dira festibalaren bultzatzaile lanetan, eta, Graboskak azaldu duenez, «edizio hibrido analogikoa» errepikatuko dute, iazkoa hala izan baitzen eta erantzun ona eduki baitzuen.

Nazioarteko eta Euskal Herriko idazleek hitzaldiak emango dituzte otsailaren 9tik 11ra bitarte. «Baina badago berritasunik ere», azaldu du Graboskak: «Workshop erako tailerrak antolatu ditugu, hezkuntza komunitatearen inplikatzeko, ikasleek pentsamendu kritikoa gara dezaten, bai eta produkzio literarioa ere». Bigarren hezkuntzako ikasleentzako saioak izango dira.

Eleberri eta kontakizun garaikideak izenburupean Jasone Osorok eta Karlos Aretxabaletak elkarrizketa bat izango dute otsailaren 9an. Ostiralean, Elise Kovakfantasia gaitzat hartuta emango du hitzaldia. Idazle «bestsellerra» da, Graboskak aurkeztu duenez, eta hogei liburutik gora idatzi ditu. Programa larunbatean amaituko da. Poesiarako leihoa tailerra izango da 16:30ean. Leire Vargas idazleak emango du, eta gazteekin bat-bateko poesia lantzea izango du helburu. Ondoren, Victoria Alvarez idazle espainiarrak girotze historikoa izango du hizpide. Irakasle eta ikertzaile akademikoa da Alvarez, eta haren nobelek migrazio historikoa izan ohi dute ardatz.

Mikrokontakizunen lehiaketa

Irakurketa sustatzeaz gain, sorkuntza bultzatzeko asmoa du Lumafest jaialdiak, eta, horregatik, zabalik dago lehiaketarako testuak bidaltzeko epea, otsailaren 4ra arte. Sariketa 14 eta 21 urte bitarteko gazteentzako da, eta 240 karaktereko muga duten testu laburrak bidali beharko dituzte babesleku hitza ardatz hartuta.

Bi modalitate izango dira: euskarazkoa eta gaztelerazkoa. Lau liburu sorta emango dizkiete sarituei: bi, sail bakoitzeko. Idazle gonbidatuek hartuko dute parte irakurketan eta hautaketan, eta haiek banatuko dituzte sariak.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.