Galdakaoko Udalak demandatu gisa aurkeztea erabaki du Usansoloko auzian

Estatuko abokatutzak jarritako helegiteari erantzutea erabaki du Galdakaoko Udalak. Atzo ilunabarrean egindako osoko bilkuran erabaki zuen demandatu gisa prozedura judizialean aurkeztea, udalak prozesu honetan egindako bidea defendatzeko. EH Bildu, Auzoak, Usansolo Herria, Podemos eta EAJren aldeko 18 boto izan zituen proposamenak, eta hiru abstentzio: PSE-EErena eta atxiki gabeko zinegotziarena.

Iragan martxoan, herri galdeketa egin zuten Usansolon, Galdakaotik bereizi eta Bizkaiko 113. udal izan nahi zuten ebazteko. «Nahi al duzu Usansolo udalerri independente gisa eratzea?». Galdera horri baiezkoa erantzun zioten %81,54k, herritarren %63k parte hartuta. Bizkaiko Batzar Nagusietan berretsi zuen erabakia, eta lurraldeko 113. udalerri gisa onartu zuen. Estatuko abokatutzak helegitea jarri zion erabaki horri; legearen arabera, herri gisa eratzeko 5.000 biztanle behar ditu, besteak beste, eta Usansolo ez da iristen. Bizkaiko Batzar Nagusiek, ordea, defendatu zuten eskumena ez dela Espainiarena, eta, horrenbestez, Espainiako legeria aplikatu beharrean, foru araua dela aintzat hartu beharrekoa. Foru arau horren arabera, 2.500 biztanle izatea nahikoa da udalerri berria eratu ahal izateko.

Iñigo Hernando Galdakaoko alkateak uste du udala behartuta zegoela bere burua alde interesatu moduan aurkeztera, «zilegi» baitira bai Galdakaoko osoko bilkurak eta bai Bizkaiko Batzar Nagusiek hartutako erabakiak. «Bizkaiko Batzar Nagusien erabakiaren aurka egin da zuzenean, baina Galdakaoko Udalak ere eman zuen bere iritzia bide horretan, eta, beraz, osoko bilkuraren kontrako helegitea ere bada». Horregatik, «zentzuzkoa» da atzo osoko bilkurak hartutako erabakia, dioenez. Gainera, azpimarratu du jarrera aldaketa izan dela EAJn eta geroz eta «jende gehiago» batu dela «foru arauaren defentsan». Izan ere, gogoratu du bere garaian EAJko zinegotziek abstentzioa eman ziotela prozesua batzar nagusietara eramateko erabakiari. Atzoko osoko bilkuran, berriz, aldeko botoa eman zuten.

Abokatuaren idatziaren aurrean epaileak zer esango duen itxarotea, besterik egiterik ez dute orain, Hernandok dioenez. Foru araua errespetatzearen aldekoa, hala ere, ez da udala bakarrik, eta balioa eman dio horri: «Lau alde gaude hemen: aldundia, batzar nagusiak, udala eta Usansolo Herria. Beraz, uste dut foru arauaren defentsa horretan lau alde egotea guztiz zilegi dela».