Urte hasierarekin, kontsumorako prezioen indizeak 0,1 puntu egin du gora Espainian, eta %5,8ra iritsi da. INE Espainiako Estatistika Institutuak KPIaren datu aurreratua ematen du hilabete bakoitzaren amaieran, eta, azken hilabeteetako jaitsieraren ostean, gora egin dute berriro prezioek.
Bestalde, azpiko KPIa ere %7,5era igo da; 1986tik altuena. Elikagaien eta energia produktuen prezioak kontuan hartu gabe kalkulatzen da adierazle hori; izan ere, prezio aldakorrenak dituzten erosgaiak dira, eta KPIa horiek kontuan hartu gabe kalkulatzeak luzera begirako joera egonkorragoa erakusten du.
Azken bost hilabeteetan, behera egin du KPIak, baina urtea hastearekin batera gora egin du berriro. 2021 amaieran eta 2022 hasieran erregaien prezioak asko handitu ziren, eta horri aurre egiteko Espainiako Gobernuak litroko 20 zentimoko deskontua ezarri zuen, abenduaren 31ra arte. Ordutik, garraiolariek dute bakarrik deskontua, eta autoaren depositoa betetzea garestitu izanak eragin du batez ere inflazioa igotzea, INEren arabera.
Hala ere, elikagaien prezioek behera egin dute azken hilabetean, Espainiako Gobernuak oinarrizko elikagaiei BEZa kendu baitie, eta olioari eta pastari %10etik %5era jaitsi die. Hilabete hasieratik hona prezioak ez dira asko aldatu; platanoak, oliba olioa eta ekilore olioa, adibidez, merkeago daude orain.
Irailetik abendura, behera egin du KPIak Hego Euskal Herrian: irailean %6,4tik %6,6ra egin zuen gora, baina urrian %6,4ra itzuli zen. Azaroan %6,2ra jaitsi zen, eta abenduan, berriz, %5,6ra.
