Albistea entzun

Zerga sistema

EAJk eta PSE-EEk elkarrizketak hasi dituzte zerga erreforma baterako

Helburua zerga sistemaren «progresibitatea handitzea» dela adierazi dute. Baina ez dute iragarri zer aldaketa aztertuko duten zehazki. ELAk eskatu du enpresa handiei zergak igotzea.

Eneko Andueza PSE-EEko idazkari nagusia eta Andoni Ortuzar EAJko EBBko presidentea, iazko urrian.
Eneko Andueza PSE-EEko idazkari nagusia eta Andoni Ortuzar EAJko EBBko presidentea, iazko urrian. Oskar Matxin Edesa/Foku Tamaina handiagoan ikusi

Aitor Biain - Maddi Iztueta Olano -

2023ko urtarrilak 31

Eusko Jaurlaritza osatzen duten bi alderdiek, EAJk eta PSE-EEk, iragarri dute hartu-emanak abiatu dituztela zerga sistemaren aldaketa bat adosteko. Ohar bateratu bat argitaratu dute alderdiek, eta bertan adierazi dute «progresibitatea handitzea» dela helburua, «euskal gizarteak aurre egin beharko dien erronkei erantzuteko».

Bi alderdien esanetan, 2013an adostutako erreforma eta 2018an onartutako doikuntzak hartuko dituzte abiapuntu gisa. Izan ere, haien esanetan, aldaketa horiek lagundu egin diete Arabako, Bizkaiko eta Gipuzkoako ogasunei unean uneko gastuei erantzuteko diru sarrera nahikoa eskuratzen, eta betiere «progresibitate zentzuzko baten barruan». Baina azken urteetako gertakariek, pandemiak eta Ukrainako gerrak kasurako, ezohiko gastuak eragin dizkiete, eta, beraz, uste dute ezinbestekoa dela sistema berrikustea orain.

EAJk eta PSE-EEk azpimarratu dute fiskalitatea dela etorkizunari erantzuteko tresnarik egokiena, baina ez dute zehaztu zer aldaketa egitea aztertuko duten. Dena den, gogorarazi dute premiazkoa dela Espainiako Gobernuak proposatutako aberastasun handien gaineko zerga onestea.

Hain justu, iazko urtearen amaieran, Itun Ekonomikoaren Batzorde Mistoaren azken bileran adostu zuten Araba, Bizkai eta Gipuzkoako foru ogasunen esku uztea fortuna handien zergaren bilketa. «Elkartasun zerga» deiturikoak, baina, ez dira martxan jarri oraindik, Espainiako Kongresuak onartu behar baitu Itun Ekonomikoaren Legean aldaketa egitea.

Aspaldiko eskakizuna
Maiatzeko udal eta foru hauteskundetarako hilabete gutxi falta direla egin dute iragarpena EAJk eta PSE-EEk, alderdiak kanpainaurrean sartuta daudela. Baina zerga sistema erreformatzea aspaldiko eskakizuna da. Oposizioak behin eta birritan eskatu baitie Eusko Jaurlaritzari eta foru aldundiei sistema berrikusteko eta aldatzeko.

EH Bilduk, esaterako, fiskalitatearen gaia mahai gainean jartzea galdegin zion Jaurlaritzari aurrekontuen negoziazioan, eta «norabide aldaketa» errotzeko eskatu. Elkarrekin Podemos-IUk ere zerga sistemaren inguruan «marra gorririk gabe» negoziatzeko eskatu zion. Aldiz, PP+CSk kontrako norabidean egin zituen proposamenak, «arintze fiskal bat» eskatuta.

Bestalde, ELAk bi alderdien asmoei erantzun die prentsa ohar baten bidez. Sindikatuak gogorarazi du «denbora luzea» daramatela fiskalitatearen premiazko erreforma eskatzen, eta, orain arte, «entzungor» egitea leporatu diete erakundeei. EAJk eta PSE-EEk abian jarri nahi duten zerga erreformaren inguruan, eskatu dute enpresen irabazien gaineko zerga %25ean kokatzea eta errenta handientzako zerga tasak igotzea.

Prentsa oharrean, azpimarratu dute enpresek gero eta mozkin handiagoak lortzen dituztela, baina langile klasea «pobretzen» ari dela. Horiek hala, sindikatuak iritzi dio «inoiz baino beharrezkoagoa» dela fiskalitatearen gaiari heltzea; aberastasuna «modu justuan» banatzeko.

Sindikatuaren arabera, azken urteetako kapital errenten bilketak behera egin du. Jaitsiera horren erantzuletzat jo dituzte, besteak beste, soldataz kanpoko errentetako iruzur fiskala eta enpresa handiek ordaindu beharreko zergak murriztu izana.

Kontuak kontu, EAJk eta PSE-EEk esan dute prozesua hasi baino ez dutela egin. Baina azpimarratu dute «lanak» elkarrekin egingo dituztela oraingoz, beste alderdiekin partekatu gabe.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jose Luis Escriva Espainiako Gizarte Segurantza ministroa, atzo, Diputatuen Kongresuan. ©J. J. GUILLEN / EFE

Pentsioen erreforma onetsi eta tramiterako onartu du Espainiako Kongresuak

Iñaut Matauko Rada

Lege proiektu gisa onetsi dute erreforma, eta tramiterako onartu. ELA sindikatuak gogor kritikatu ditu EH Bildu eta EAJ, bidea emateagatik
Elma Saiz, atzo, Nafarroako Parlamentuko batzordean. Legealdiko azkena izan zen. ©IÑIGO URIZ / FOKU

Saizek onartu du denbora gutxi izateak funtsen planifikazioa baldintzatu duela

Joxerra Senar

Ekonomia kontseilariak esan du Nafarroako Kontu Ganberaren aholkuak beteko dituela. Nafarroak 483 milioi euro jasotzea espero du
Arrantza ontzi bat, ostegun honetan, Donibane Lohizune-Ziburuko portuan. ©Guillaume Fauveau

Lapurdiko arrantzaleak «hilzorian», izurdeak babesteko neurriengatik

Jokin Sagarzazu

Frantziako Estatu Kontseiluak sei hilabeteko epea eman dio Parisi arrantza eremu batzuk ixteko. Sektoreak portuak eta lonjak itxi ditu bi egunez. Erabakia Hegoaldera zabaltzea aztertzen ari da Brusela.

Anton Arriola eta Eduardo Ruiz de Gordejuela. ©Kutxabank

Eduardo Ruiz de Gordejuela izango da Kutxabankeko kontseilari ordezkari berria

Iñaut Matauko Rada

BBKn eta Kutxabanken 30 urte baino gehiagoko ibilbidea du Ruiz de Gordejuelak. Europako Banku Zentralak onartu behar du izendapena.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.