Gipuzkoako hiriburuko Bilbo plaza ondoan eraberritzen ari diren etxe batetik erorita, gizon bat hil zen atzo, telekomunikazio lanetan zebilela.
Ezbeharra Prim kaleko 12. zenbakiko eraikinaren barruan izan zen. Patiora erori zen langilea, baina zer gertatu zen ikertzen ari dira oraindik. Suhiltzaileek eman zuten haren heriotzaren berri, eta 32 urte zituen.
ELAren arabera, dagoeneko bost dira aurten lan istripuen ondorioz Hego Euskal Herrian hil diren langileak. Horietako bi Gipuzkoan hil dira. Horiek hala, eraikuntza sektoreko langileek pairatzen dituzten lan baldintza «kaskarrak» salatu zituen ELA sindikatuak atzo, argitaratutako prentsa oharrean.
Azpimarratu zuten lan istripuak ez direla «fenomeno naturalak», baizik eta enpresaren «etekin ekonomikoak» langilearen lan eta bizi baldintzen aurretik jartzearen ondorioa. Adierazi zuten ezen, enpresen «betegabetzeak behar bezala» kontrolatzeko, Osalanen eta lan ikuskaritzen langile taldeak bikoiztu behar lituzketela, «kolapsatuta» daudelako.
