Palestinako Osasun Ministerioak zabaldutako datuen arabera, Israelek 224 palestinar hil zituen iaz, horietatik 53 adin txikikoak. Horrez gain, 10.500 izan ziren segurtasun indarren oldarraldietan zauritutako palestinarrak, eta horietatik %38k bala zauriak zituzten gerritik gora. Aurten, eskuin muturra gobernura heldu zenetik, gogortu egin dira palestinarren aurkako operazioak, eta soilik urtarrilean 35 pertsona hil zituzten, tartean zibilak.
Bestalde, Israelgo armadaren gerra hegazkinek Gazako hainbat eremu bonbardatu dituzte goizaldean. Israelgo Gobernuko iturrien esanetan, aurrez Palestinatik jaurtitako suziriei erantzutea izan da erasoaldiaren helburua. Hamasek «gai kimikoak» gordetzeko eta «misilak egiteko» erabiltzen dituzten biltegiak suntsitu dituztela zabaldu dute armadako iturriek. Ez da zauriturik egon.
Bonbardaketaren ondoren, suziri gehiago jaurti dituzte Gazatik Israel aldera. Palestina Askatzeko Fronte Demokratikoak bere gain hartu du suzirien jaurtiketa, eta esan du Israelgo espetxeetan preso dauden palestinarren eskubide urraketei emandako erantzuna izan dela. Israelgo Barne ministro Itamar Ben-Gvirrek sare sozialetan zabaldutako mezu batean erantzun dio talde armatuari, eta ohartarazi du jarraitu egingo duela preso palestinarren «baldintzak gogortzen».
Giza eskubideen aldeko erakundeek maiz kritikatu dute Israelen espetxe politika, batez ere preso administratiboen auzian; izan ere, akusazioen berri izan gabe espetxeratzen dituzte horiek, eta aukera dute zigorra sei hilabetean behin berritzeko.
