Pentagonoak iragarri du Txinako ustezko globo aerostatiko bat atzeman dutela Montana gainean hegan, baina ez duela «arrisku militar edo fisikorik» hango biztanleentzat. Pat Ryder Pentagonoko bozeramaileak zehaztu du uneotan AEBak globoaren mugimenduak «aztertzen» ari direla, eta berehalako neurriak hartu dituztela Txinak ez dezan «informazio delikaturik bildu». Ryderrek berak adierazi du aurreko urteetan ere detektatu izan dituztela horrelako gailuak.
Hasieran, globoa lurrera botatzea aztertu zuten AEBek, baina baztertu egin zuten azkenean, puskak erortzea arriskutsua izan zitekeelako han bizi direnentzat, Mark Milley Estatu Nagusi Bateratuko buruaren arabera.
Globoa, itxuraz, Alaskatik sartu zen AEBetan, eta hainbat «leku sentikorren» gainetik igaro zen. Izan ere, Montanan, biztanleria dentsitate txikiena duten estatuetako batean, armamentu nuklearreko hainbat gune daude. Nolanahi ere, Pentagonoko buruzagi militarren arabera, «ez dirudi globoak teknologia bereziki aurreratua duenik, ezta Pekinek beste bide batzuetatik —sateliteen bidez, esaterako— lortu ezin duen informazioa lortzeko gaitasunik duenik ere».
Akusazio horiek entzunda, «espekulaziorik ez egiteko» eskatu du Txinak: «Gertakariak argitzen diren arte, zalapartak ez du lagunduko gai hau modu egokian konpontzen», adierazi du Mao Ning Atzerri gaietako ministroak. Maok jakinarazi duenez, ustezko globo espioiari buruzko informazioa egiaztatzen ari da Pekin, baina ohartarazi du Txinak ez duela «inolako asmorik inongo estatu burujaberen lurraldea edo aireko eremua urratzeko».
Gertakariak, ordea, nahastu egin du bi herrialdeen arteko giroa, noiz eta Antony Blinken AEBetako Estatu idazkaria Txinara egitekoa den bi eguneko bisitaren atarian. 2018. urteaz geroztik, AEBetako Atzerri gaietako buruzagi batek herrialde hartara egiten duen lehen bisita da Blinkenena. Donald Trumpen garaian, Txinaren produktuei ezarritako muga zergen ondorioz, bi herrialdeen arteko tirabirak areagotu egin ziren, eta harremanak onbideratzeko ahalegintzat hartu da Blinken bisita. Ikusteko dago globo espioiaren gertakariak zenbateraino eragiten duen hartu-eman diplomatiko horretan.
