Aste hasieran, Alemaniako kantziler Olaf Scholzek baztertu egin zuen gerrako hegazkinak Ukrainara bidaltzeko aukera, Mendebaldeak Ukrainako armadari tankeak ematea adostu ondoren; AEBek 31 Abrams entregatu dizkiote Kievi, eta Alemaniak, berriz, hamalau Leopard 2. Bada, hegazkinen ordez, Berlinek tanke gehiago bidaliko ditu gerra frontera; oraingo honetan, Leopard 1 tankeak. Hala baieztatu du gaur herrialde horretako eledun Steffen Hebestreitek, Süddeutsche Zeitung egunkariak albistea aurreratu ondotik.
Berlinek Kievera bidaliko dituen Leopard 1 tankeak fabrikatzaileen egoitzetan daude; besteak beste, Rheinmetallen eta Flensburger Fahrzeugbau Gesellschaften, eta, Alemaniako bozeramailearen esanetan, tanke horiek «egokitu» eta «berrikusi» egin behar dituzte Ukrainara eraman aurretik. Tankeak entregatzeko prest noiz egongo diren itaunduta, Alemaniako armadaren bozeramaile batek esan du ekoizleek erantzun behar diotela galdera horri.
Süddeutsche Zeitung-ek jakinarazi zuenez, Alemaniako Gobernuak Rheinmetall arma ekoizlearen asmoak onartu zituen, Leopard modelo zaharrenetatik 88 tanke Ukrainari saltzeko, ehun milioi euro baino gehiagoko kostuarekin. Halaber, kazeta horren arabera, «arazoak» dituzte Leopard 1 tankeari dagozkion 105 milimetroko munizioak lortzeko.
Tankeekin lotuta, bestalde, Norvegiak gaur baieztatu du 54 Leopard 2 erosiko dizkiola Alemaniari, gerora beste hemezortzi gehiago erosteko asmoarekin, Jonas Gahr Store lehen ministroak iragarri duenez.
Bien bitartean, EB Europako Batasuneko zenbait goi kargudun goi bilera egiten ari dira Kieven, Ukrainako presidente Volodimir Zelenskirekin batera. Batzar horretan daude, besteak beste, Europako Batzordeko presidente Ursula von der Leyen, Europar Kontseiluko buru Charles Michel eta talde komunitarioko beste hamabost komisario.
Back in Kyiv for the EU-#Ukraine Summit with @ZelenskyyUa@vonderleyen and @JosepBorrellF
— Charles Michel (@CharlesMichel) February 3, 2023
There will be no let up in our resolve.
We will also support you every step of the way on your journey to the EU. pic.twitter.com/3fnmajrtAZ
AEBetako Associated Press berri agentziaren arabera, gisa horretako goi bilera 2021eko urrian egin zuten Kieven azkenekoz, Errusiak Ukraina inbaditu baino hilabete batzuk lehenago. Ordutik, EBk 50.000 milioi euroko laguntza eman dio, eta datozen asteetan Errusiaren aurkako hamargarren zigor sorta onartzeko asmoa du.
Bada, klubeko diplomaziaburu Josep Borrellek Twitter bidez adierazi du EBk beste 25 milioi euroko babes humanitarioa bidaliko diola Kievi; energia ekipamenduari dagokionez, berriz, 35 milioi LED bonbilla, 2.400 sorgailu eta herrialdeko eraikin publikoetan jarriko dituzten eguzki planen finantzaketa.
Gerra frontean, Errusiako armadak Kharkiv eskualdeko Barvinkove herria bonbardatu du gaur goizaldean, eta gutxienez bi pertsona hil eta beste bat larri zauritu ziren, eskualde horretako gobernadore Oleh Syniehubovek salatu duenez, The Kyiv Independent egunkariak jasotakoaren arabera.
Eta Errusiak iazko urrian anexionatutako Zaporizhia probintzian, pertsona bat hil da, bonba auto bat lehertu ostean. Hala jaso du TASS Errusiako berri agentziak.
Krimeako agintariek —Errusiak 2014an anexionatu zuen—, berriz, iragarri dute Ukrainako politikari eta enpresarien bostehun bat jabetza «nazionalizatu» egin dituztela. Vladimir Konstantinov Krimeako Parlamentuko presidenteak zehaztu du, gainera, terrorismoaren aurkako batzordeak lanean jarraituko duela «Kieveko erregimenaren konplizeen ondasunak identifikatzeko». Krimeako Gobernuaren webgune batean kaleratutako dokumentu baten arabera, zerrenda horretan daude, besteak beste, Arseni Jatsenyuk Ukrainako lehen ministro ohia, eta Igor Kolomoiski, Rinat Akhmetov eta Serhi Taruta enpresariak.
