Arantxa Tapia Eusko Jaurlaritzako Ekonomiaren Garapen, Iraunkortasun eta Ingurumeneko sailburuak Verter Recyclingi exijitu dio behin betiko zigilatu dezala duela hiru urte amildu zen Zaldibarko zabortegia, eta har ditzala itxi ondorengo kontrol eta jarraipen neurriak. Astelehenean hiru urte bete ziren Eitzagako zabortegia (Zaldibar, Bizkaia) kraskatu eta amildu zenetik: hiru urte, beraz, Alberto Sololuze eta Joaquin Beltran hango langileak hil zirenetik eta ingurumenean eragin larriak eragin zituenetik. Sololuze, Beltran eta haien sendiak gogoan izan ditu Tapiak gobernu kontseiluaren osteko prentsaurrekoan.p>
Ikusi gehiago:Podcasta: 'Zaldibar: hiru urte, hainbat zauri eta itzal ugari'
Adierazi duenez, Eusko Jaurlaritzak «hasiera-hasieratik» lanak egin zituen desagertutako langileak bilatzeko, bai eta zabortegia egonkortzeko eta ingurumenaren gaineko kalteak prebenitzeko bitartekoak jarri ere. Nabarmendu du gaur egun Zaldibarko zabortegia «egonkortuta eta zigilatuta» dagoela, baina ohartarazi du behin betiko zigilatzea egin gabe dagoela, eta Verterri exijitu dio lan hori egiteko. Tapiak azaldu du Jaurlaritzak egindako ikuskapenetan egiaztatu ahal izan dutela eremuak «egonkorra» izaten jarraitzen duela, baina ez dela behin betiko zigilatze prozesurik hasi, eta, hargatik, itxi ondorengo kontrol eta jarraipen neurriak hartzeko ere galdegin dio enpresari. Jaurlaritzak Fiskaltzari jakinarazi dio enpresak egin gabe dituela zigilatze lanak.
Zaldibarren hondamendia eragin zuen zabortegiaren jabeek Verter Recycling enpresa likidatzeko bidea hartu zuten, eta Jaurlaritzak 28,7 milioi euro eskatzen dizkio enpresari, hondamendiaren ostean egin behar izan ziren lanengatik. Diru hori eskuratzeko, Eusko Jaurlaritzak erabaki du premiamendu bideari ekitea, diru horren zati handiena berreskuratu ahal izateko.
Tapiak gaineratu du irekitako prozesu judizialak aurrera jarraitzen duela, eta Eusko Jaurlaritza prest dagoela justiziari laguntzeko.
