Gasteizko Jazzaldia iristeko bost hilabete eskas falta direnean, antolatzaileek bertan parte hartuko duten lehenengo bi musikariak iragarri dituzte: Maria Schneider eta Brad Mehldau. Biak ala biak Mendizorrotza kiroldegiko agertokian ariko dira.
Uztailaren 5ean, asteazkenez, Maria Schneider konpositore, pianista eta orkestra zuzendariak (AEB, 1960) Data Lords bere azkeneko diskoa aurkeztuko du Oslo jazz Ensemble taldeak lagunduta. Lan horrekin, zeinak teknologia enpresa handien jarduna kritikatzen duen, bi Grammy sari eskuratu zituen musikariak.
Schneider 1980ko hamarkadaren erdialdean hasi zen musika munduan, eta orduz geroztik bakarkako lanak nahiz kolaborazioak uztartu ditu. Esaterako, David Bowieren azkeneko diskoan (Blackstar) parte hartu zuen. Orain dela hiru urte, Donostiako Jazzaldian izan zen Ensemble Denada taldearekin.
Brad Mehldau pianista (AEB, 1970), berriz, bere belaunaldiko jazz musikaririk ospetsuenetakoa bilakatu da, eta behin baino gehiagotan izan da Euskal Herrian. Gasteizko Jazzaldian, adibidez, Pat Metheny eta Joshua Redmanekin aritutakoa da. Aurten, Larry Granadier kontrabaxu jotzailea eta Jeff Ballard bateria jolea izango ditu oholtzako kide, uztailaren 6an. Jacob's Ladder (2021) du bere azkeneko lana.
