Animalien aurkako tratu txarrak gogorrago zigortzea onetsi du Espainiako Kongresuak

Espainiako Kongresuak animaliak babesteko lege proiektua onartu du, besteak beste PSOE, Unidas Podemos eta EH Bilduren babesarekin. Zehazki, legegaiak aldeko 174 boto jaso ditu, eta kontrako 167. Gainera, horrekin batera eta animaliei egindako tratu txarrak gogorrago zigortzeko, Zigor Kodea erreformatzearen alde egin du Kongresuak, aldeko 178 botorekin. Orain senatuan jarraituko dute eztabaidarekin.

Ehiza txakurren babesa izan da lege proiektuaren tramitazioan azaleratutako gatazketako bat. Izan ere, PSOEk, PPk eta Voxek adostutako zuzenketa batek legearen babesetik kanpo uzten ditu ehiza txakurrak. Ione Belarra Espainiako Eskubide Sozialen eta 2030erako Agendaren ministroak azaldu du ahal izan duten bezain urrun iritsi direla eta animalia guztien babesaren alde lan egiten jarraituko dutela. Juantxo Lopez Uralde Podemoseko diputatuak ere nabarmendu du animaliak babesteko eta horien eskubideak aitortzeko lege «oso garrantzitsua» dela.

Besteak beste, EH Bilduren babesarekin egin du aurrera legeak. «Animaliak babestea eta tratu duin bat bermatzea behar bat da», esan du Iñaki Ruiz de Pinedo diputatuak. Aitortu du pausoa «motz» geratu dela, baina erantsi legeak aurrerapauso bat emango duela animalien babesean.

Eskumen talka

Espainiako Kongresuaren onarpenak, ordea, zalantza bat zabaldu du: nola eragingo duen Eusko Legebiltzarrak eta Nafarroako Parlamentuak arlo horretan aurrez onartutako legeetan, eta, beraz, zeinek duen arlo horri dagokion eskumena. Eusko Legebiltzarrak iazko uztailean onartu zuen etxeko animaliak babesteko legea, EAJren, EH Bilduren, PSE-EEren eta PPren botoekin, eta Elkarrekin Podemos-IUren eta Voxen abstentzioekin. Horren arabera, 100.000 eurorainoko isunak jar daitezke animaliei tratu txarrak emateagatik. Nafarroako Parlamentuak 2019an onartu zuen arlo horretako arau bat.

Beraz, zein arau nagusituko da: Eusko Legebiltzarrekoa eta Nafarroako Parlamentukoa, edo Espainiako Gorteetakoa? Kongresuko eztabaidan, Joseba Agirretxea EAJko diputatuak salatu du Espainiako legeak euskal instituzioek emandako arauak urratuko dituela eta Espainiako Gobernua ez dela gai izan azaltzeko zein eskumen tituluren arabera arautu duen animalien babesa.

Eusko Jaurlaritzako Garapen Ekonomiko, Iraunkortasun eta Ingurumen Sailak Efe berri agentziari azaldu dioenez, Araban, Bizkaian eta Gipuzkoan indarrean egongo den legea Eusko Legebiltzarrekoa da, baina Espainiako legearen tramitazioa amaitu arte itxaron beharko da ikusteko legearen zein esparru diren bete beharrekoak. Hala ere, Jaurlaritzak nabarmendu du euskal legeak ehiza txakurrak babesten dituela, salbuespen batzuekin.

Podemosek, ordea, ez du talkarik antzematen bi legeen artean. Alderdiko iturriek BERRIAri adierazi diotenez, Espainiako legeak gutxieneko batzuk ezarriko ditu, bete beharrekoak, baina, Eusko Legebiltzarrak eta Nafarroako Parlamentuak onartutako arauek babes handiagoa ematen duten ataletan, horiek nagusituko dira.