Eraikuntza
Etxebizitza salmenta %7,4 handitu zen 2022an, Hegoaldean
Etxe babestuen kopurua %14,4 hazi da, baina ez dira hamarretik bat ere.
Inflazio handiak ez du gerarazi etxebizitzen merkatua. INEren behin-behineko datuen arabera, iaz 30.330 etxebizitza salerosi ziren Hego Euskal Herrian, aurreko urtean baino 2.097 gehiago (+%7,4).
Kopururik handiena da 2007. urteaz geroztik, baina ordutik hona aldaketa handiak izan dira etxebizitzen merkatuan. Urte hartan —eraikuntzaren boom-a amaitzen ari zela— saldutako 35.732 etxebizitzetatik %47,1 izan ziren berriak. Iaz, berriz, %19,8 izan ziren. Edonola ere, iazko datuak erakusten du motel bada ere hazten ari dela etxebizitza berrien eraikuntza, 2020an %18,8 izan baitziren.
Etxebizitzen eraikuntzan alde handia dago lurralde batetik bestera. Horrela, Nafarroan iaz saldutako etxebizitzen %32,7 izan ziren berriak, baina %13,6 baizik ez Gipuzkoan. Tartean daude Araba (%18,7) eta Bizkaia (%17).
Babestuen afera
Aldea dago etxebizitza babestuen kopuruan ere. Hego Euskal Herrian %9,7 izan ziren iaz, baina askoz gehiago dira Araban (%16,6) eta Nafarroan (%12,3), Bizkaiarekin (%8,4) eta Gipuzkoarekin (%%6,2) alderatuz gero.
Edonola ere, 2022an etxebizitza babestuen salmentaren gorakadak (+%14,4) bikoiztu egin du merkatu librekoena (+%6,7).
Azken urteetan, eraikuntza enpresak kexu dira etxe babestuen prezioa apalegia dela eta horregatik behar baino gutxiago eraikitzen direla. «Legez, etxe berrien %75ek babestuak izan behar dute, baina horien prezioa hamabi urtez izoztuta egon da. Norbaitek uste al du hamabi urtean kostuak ez direla igo? Langileek soldata bera izan al dute? Ez, urtero igo dira. Babestuen prezioa igotzen ez bada, libreekin bakarrik posible al da gainkostuei eustea? Ez, horregatik ez dira egiten», azaldu du Iñaki Urresti Ascobi Bizkaiko eraikuntza enpresen elkarteko buruak.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
