Washingtonentzat «zilegi» da Ukrainak eraso egitea Errusiak Krimeako penintsulan dituen instalazio militarrei. Hori adierazi zuen ekitaldi batean, atzo, Victoria Nuland AEBetako Estatu idazkariordeak. Argudiatu zuen Ukraina ez dela «seguru» sentituko Krimea desmilitarizatuta egon arte, «gutxienez». Horiek horrela, gerraren areagotzea bultzatzea egotzi die Errusiak AEBei.
Errusiak 2014an anexionatu zuen Krimeako penintsula, eta, Moskuren arabera, azken egunetan han egindako erasoak areagotu ditu Ukrainak. Sebastopol hiriko gobernadore Mikhail Razvozhaevek salatu du, Telegramen, Ukrainak ahalegina egin duela drone batekin hiriko instalazio elektriko bati eraso egiteko, baina aireko defentsa sistemek erorarazi egin dutela. Jakinarazi zuen atzo antzeko eraso bat gertatu zela baina orduan ere neutralizatu egin zutela dronea.
Eta hori guztia aintzat hartuta, Maria Zakharova Errusiako Atzerri Ministerioko bozeramaileak esan du, astero ematen duen prentsaurrekoan, Washington ari dela Ukraina «xaxatzen» gerra Errusiako «lurretara» eramateko. «Honi buruz aspaldi ohartarazi genuen, eta operazio militar berezi bat egitera behartuta ikusi genuen geure burua», jaso du Tass Errusiako berri agentziak. «Beste behin argitu behar dugu AEBak nola ari diren parte hartzen Ukrainako gatazkan. Arma ugariz hornitzen dute, inteligentzia ematen diote, operazio militarren planifikazioan zuzenean parte hartzen dute, eta Ukrainako militarrak entrenatzen dituzte». Moskuk salatu du, bide batez, Ukrainarekin muga egiten duen Errusiako Kursk eskualdeko bi herriri eraso egin diela Kievek azken orduetan. Hango gobernadoreak ez du zehaztu nola gertatu den, baina esan du leherketak entzun direla.
Iazko martxoan, mahai baten bueltan eseri ziren Errusiako eta Ukrainako ordezkariak, eta Kremlinek orduan nabarmendu zuen bai Donbass eta baita Krimea ere «ukiezinak» zirela. Horrekin lotuta, Ukrainako presidente Volodimir Zelenskiren aholkulari Mikhailo Podoliakek errepikatu du, txio batean, Kievek negoziatzeko daukan ezinbesteko baldintza dela Errusiako indarrak Ukrainatik erretiratzea.
Bakhmut hutsarazteko
Gerra frontean, Irina Verestxuk Ukrainako lehen ministrordeak eskatu die Donetsk eskualdeko Bakhmut hirian jarraitzen duten 6.000 bat zibilei handik «berehala» alde egiteko. Azken hilabeteetako borrokagune nagusietako bat izan da Bakhmut. Hura kontrolpean hartzea ezinbestekoa da Errusiarentzat, Kramatorsk eta Sloviansk hirietara hedatu ahal izango lukeelako erasoaldia, eta, horrenbestez, Donetsk osorik hartzeko moduan egongo litzatekeelako. Kremlin azken egunetan esaten ari da aurrerapausoak ematen ari dela Bakhmut konkistatzeko ahaleginean.
Bestalde, Ukrainako Gobernuak iragarri du datorren astean hasiko dituztela negoziazioak zerealen esportaziorako akordioa luzatzeko. «Uste dut sen ona gailenduko dela eta korridoreari eutsiko zaiola», esan du, agerraldi batean, Ukrainako Azpiegitura ministrorde Jurii Vaskovek. NBE Nazio Batuen Erakundeak babestuta eta Turkiaren bitartekaritzarekin, Kievek eta Moskuk akordio bat sinatu zuten joan den uztailean, Ukrainako hiru portutatik abiatuta Itsaso Beltzetik barrena laboreak esportatzeko. Joan den azaroan adostu zuten ituna beste lau hilabetez luzatzea, eta, okerrik ezean, berritzekoa da. Errusia ez dago pozik, ordea, akordioaren zenbait punturekin, eta eskatu izan du bere nekazaritza esportazioei AEBek eta EB Europako Batasunak jarritako zigorrak kentzeko.
