Acciona Plug enpresak 87 milioi euroko inbertsioa egingo du Zangozan (Nafarroa), hidrogeno berdea produzitzeko planta bat egiteko. Nafarroako Gobernuko agintariekin batera aurkeztu dute proiektua, Zangozan bertan, eta Maria Txibite Nafarroako Gobernuko presidenteak aurreratu du biharko saioan foru intereseko proiektu izendatuko dutela.
Txibitek eskerrak eman dizkio Acciona Plugi proiektua Nafarroan garatzeagatik, eta adierazi du lantegia «estrategikoa» izango dela: «Karbono isuri urriko ekonomia berriaren erakusleiho izango da, industriarentzat eredu». Txibitek esan duenez, eskualdean energia kontsumo handia duen industriari energia garbia emango dio planta berriak, baita Zangoza berrikuntzaren mapan jarri ere.
Valle H2V Navarra
Acciona Plug sozietateak —%50 Accionarena eta %50 Plug Powerrena— egingo du hidrogeno berdea sortzeko lantegi berria, Accionaren Zangozako Biomasa plantaren ondoan. 25 megawatteko (MW) elektrolizagailua eraikiko dute plantan, eta, hori hornitzeko, parke eoliko bat eta parke fotovoltaiko bat egingo dituzte: 24 MWekoa lehena, eta 25 MWekoa bigarrena.
Urtean 3.880 tona hidrogeno berde produzitzeko ahalmena izango du lantegiak, eta eraikuntza fasean 500 lanpostu inguru sortuko direla kalkulatu dute. Sortutako energiaren %90 inguru industriak kontsumitzeko izango da, eta gainerako %10 garraiorako erabiliko da; horretarako, lantegian bertan hidrogeno instalazio bat eraikiko dute.