‘20.000 especies de abejas’ Berlinaleko lehian erakutsi du Estibaliz Urresolak

Euskara entzun ahal izan da gaur Berlinale Palasten. Hain zuzen ere, Estibaliz Urresola Solaguren (Laudio, Araba, 1984) zinemagileak bertan estreinatu du 20.000 especies de abejas filma, Berlingo zinema jaialdiaren 73. aldiko lehia ofizialaren barruan. Filmak euskara eta gaztelera erabiltzen ditu, eta euskal musika, Lourdes Iriondo tartean. Sexu aniztasunaren aldarria egiten du lanak, haurren errealitateak ardatz hartuta. «Zinematik abiatuta, nire lanbidetik, ekarpen bat egin nahi nuen, itxuraz elkarrengandik oso urruti dauden jarrerak gerturatze aldera», adierazi du zuzendariak, prentsarako emanaldiaren ondotik. Lehen aldia da euskal zinemagile batek Berlinaleko Sail Ofizialean bere lehen filma erakusten duena; eta zinema jaialdiko hartzetako bat sari gisa eramateko hemeretzi hautagaien artean dago Urresolaren lana.

Narrazioko protagonista haur bat da (Sofia Oterok interpretatu du haren rola), eta haren barne bizitza eta familia, eskola eta gizarte ingurunea erretratatu ditu zuzendari arabarrak. Ez da eroso sentitzen Aitor izenarekin, ez eta Coco izen neutralarekin deitzen diotenean ere. Haren gurasoek jarrera diferenteak dituzte horren gainean: amak (Patricia Lopez Arnaiz) aniztasunerako eskubidea onartzearen aldeko iritzia agertzen du, eta aitak (Martxelo Rubio), berriz, goizegi deritzo 8 urteko haurrak barruan duenari, Luciari, bide emateko. Haiekin batera, elkarrengandik «urrun» egon litezkeen beste jarrera batzuk ere agertzen dituzte pertsonaiek, hala nola elizara joan ohi den amonak (Itziar Lazkano) eta erlezaina den izebak (Ane Gabarain). Guztiek haurren transexualitatearen inguruko ikuspegi ezberdinak erakutsiko dizkiote ikusleari, betiere harenganako maitasuna erdigunean dela. Urresolaren ustez, zinema «askotariko errealitateak gerturatzeko tresna bat» izan daiteke.

Zuzendariarekin batera, filmeko lantaldeko hainbat kide izan dira Berlinen gaurko estreinaldian, tartean Otero, Lopez Arnaiz, Gabarain, Lazkano eta Sara Cozar aktoreak, eta Lara Izagirre zein Valerie Delpierre ekoizleak.

'Cuerdas'-en ondotik

Zuzendariaren aurreko lana, Cuerdas laburra, Cannesko jaialdian estreinatu zuen Urresolak —Urrezko Erraila saria lortu zuen—. Muskizko (Bizkaia) Petronorren lantegia oinarri hartuta, enpresaren boterea eta eragindako osasun kalteak azaleratu zituen lanak, eta Donostiako Zinemaldiko Zabaltegi-Tabakalera sailean ere erakutsi zuen.

Lan berriak saririk ekarriko ote dion larunbatean argituko du Kristen Stewart buru duen epaimahaiak. 20.000 especies de abejas apirilaren bukaeran helduko da zinema areto komertzialetara.