Energia kontsumoari balazta jarri nahi dio Europako Batasunak, eta 2030erako energia kontsumoa %11,7 gehiago murriztea du helburu. 2020an egin zituzten energia kontsumoaren 2030erako azken aurreikuspenak, baina klima larrialdiaren larritasuna ikusita eta egoera geopolitikoak hauspotuta, kontsumoa are gehiago murriztu nahi dute orain.
Europako Parlamentuaren eta Kontseiluaren artean adostu dute energia kontsumoaren muga berria, baina oraindik 27 estatu kideek eta Estrasburgoko (Frantzia) parlamentuak onartu behar dute.
Estatu kide bakoitzak bere aldetik hartu beharko ditu energia kontsumoa murrizteko neurriak, eta gobernu bakoitzak energia eta klima planak berritu beharko ditu aurten edo datorren urtean. Europako Batzordeak energia kontsumoaren murrizketa adierazgarri edo orientagarri bat jarriko dio herrialde bakoitzari, eta gehienez %2,5 aldendu ahal izango dira. 2030ean Europako Batzordeak kalkulatuko du ea herrialde bakoitzak hartutako neurriak batuta %11,7ko helburua lortu den.
Hala ere, amaierako energia kontsumoa hartuko da kontuan kalkulu horietarako, hau da, erabiltzaileek egindako kontsumoa. Beraz, energiaren produkzioan eta horniketan egindako kontsumoa ez da kontuan hartuko.
