Hamaika egunez eztabaidatu ostean, eta gauerdirako 25 minutu besterik falta ez zirela, Emmanuel Macronen Gobernuak ezarri nahi duen erretreta sistemaren erreformari onespena eman zion atzo Frantziako Senatuak. Orain, batzorde batean aztertuko dute gaia, testua adosteko, eta legebiltzarreko bi ganberetan bozkatuko dute berriz, martxoaren 16tik aurrera.
Elisabeth Borne lehen ministroak garaipena ospatu zuen sare sozialetan, bozketa egin eta minutu gutxira: «Erabat engaiaturik gaude datozen egunetan [erreforma] behin betiko onartzeko».
#Vote | Après une centaine d’heures de débat, le Sénat adopte le texte de la réforme des retraites. Une étape décisive pour faire aboutir une réforme qui assurera l’avenir de nos retraites. Totalement engagée pour permettre une adoption définitive dans les prochains jours. pic.twitter.com/c2KC0XxB0s
— Élisabeth BORNE (@Elisabeth_Borne) March 11, 2023
195 senatarik alde bozkatu dute, eta 112k aurka. Beste 37 abstenitu egin ziren.
Errepublikanoen laguntzari esker lortu zuen gobernuak erreforma onartzea.
«Soldatapeko guztientzako egun beltz» gisa gogoratuko da, PSF alderdi sozialistako senatari Monique Lubinek bozketaren aurreko eztabaidan esan zuenez.
Orain, Asanblea Nazionalean dago jarrita arreta guztia. Datorren ostegunetik aurrera eta martxoaren 26ra arte zabalduko da erreforma bozkatzeko epea. Lehia estua espero da.
Macronek erretiro adina bi urtez atzeratu nahi du erreformaren bitartez: 62 urtetik 64ra. Manifestazio, greba eta protesta ugari egin dituzte herritarrek azken egunotan erreformaren kontra, sindikatuek deituta. Datorren asteazkenean, beste mobilizazio egun batera deitu dute, batzordean testua aztertuko dutelako.
Ostiraleko protesta egunean, 7.300 lagun bildu ziren Baionako protestan.
Ikusi gehiago:Eliseoak eztabaida blokeatu arren, kaleak gori jarraitzen du
