Iruñeko Paris 365 jangela solidarioan egoera «bitxi bat» izan da 2020tik hona. «Gero eta menu gehiago» zerbitzatzen dituzte, eta jende gutxiago artatu. «Ondorioa argia da: erabiltzaileek denbora gehiagoz behar dute gure laguntza», azaldu du Mikel Urabaien Paris 365eko ordezkariak.
Goizean egindako prentsaurrekoan, datuen bidez deskribatu dute euren jangelan egunero ikusten duten errealitatea, baina argi utzi nahi izan dute datuen atzean hezur-haragizko pertsonak daudela. Hala, iaz 48.142 menu zerbitzatu zituzten —menu batek gosaria, bazkaria eta afaria biltzen ditu—, 2020an baino %45 gehiago. Alta, epe berean erabiltzaile kopurua %35 apaldu da: 1.200 lagun izatetik 776 izatera pasatu ziren iaz.
Paris 365 jangelako arduradunen arabera, horrek esan nahi du pobrezia «larriagotu» egin dela, jantokiko erabiltzaileentzat eta biltegiko familientzat «are zailagoa» delako egoera horretatik ateratzea. «Geroz eta gutxiago aldatzen direnez, kasu bakoitzari egin behar zaion jarraipena luzerako da».
Ondorioz, haien itxaron zerrenda handituz doa, edo gero eta pertsona gehiagori esan behar diete ezin dituztela artatu bolada batez. Mirian Garciak onartu du euren ahulgune bat dela hori. «Esku hartzeko orduan eta etikoki, barne gatazka eragiten digu jendeari esateak ezin dugula artatu. Ez dugu itxaropen faltsurik eman nahi, eta ez gaude egun batzuk barru jangelan tokia egingo dela esateko moduan». Egunero 65-70 pertsonari ematen diete jatera, eta ez dute espazio fisikorik eta otordu gehiago prestatzeko ahalmen gehiagorik. Astean 20-30 laguni ematen diete ezezkoa. «Errealitate bat da, eta guztion erantzukizuna da hori, zerbitzu publikoena eta pribatuena».
Krisiaren eragina
Krisi ekonomikoaren eragina ere nabaritu dute Paris 365 jangela solidarioan. Alde batetik, hiru urteotan dohaintzak gutxitu egin dira; batik bat, jeneroan egiten diren dohaintzak, %45 gutxitu baitira. Ondorioz, elikagai gehiago erosi behar izan dituzte, eta herritar ororen moduan, bizimoduaren garestitzea nabaritu dute. Erosketak oro har %56 garestitu dira hiru urteotan.
Horren guztiaren aurrean, Mirian Garciak ohartarazi dio administrazio publikoari Iruñerrian jende askok behar handia duela, kalteberago baitira inflazioaren aurrean. «Uneotan ditugun baliabideak ez dira nahikoa eskariari erantzuteko. Ez da aski esatearekin oinarrizko beharrak artatzeko deialdiak egongo direla». Adibide gisa hartu du deialdi horietako kopurua ez dela handitu eta kostuen igoera ez dela KPIaren arabera eguneratu. «Ez bada aurrekontua handitzen, entitate gehiago aurkez gaitezke deialdi horretara, baina banatu beharreko opila berbera da».
Garciak gogoratu du egunero hiru otorduak eta lo egiteko toki bat bermatzerik ez badago nekez atera daitekeela inor egoera horretatik. Haren ustez, gizarte politikak egiterakoan lehentasunezkoa izan behar duerrealitate horri erantzuteak.
Webgune berria
Bere lanaren berri emateko webgunea berritu du Paris-365 jangela solidarioak. Ko Estudios arduratu da diseinuaz. Eduki guztia ele bitan dago. Albisteekin batera, dohaintzak egiteko eta nahieran eta libreki kuotak ordaintzeko moduak azaltzen dira.
Gainera, jakinarazi dute jangelaz arduratzen den Gizakia Herritar fundazioaren patronatua berritu egin dela. Maite del Campori lekukoa hartu dio Josean Villanueva presidenteak. Hark lehendakariordetzan utzitako hutsunea Maribel Turiasek hartu du. Sagrario Soto izendatu dute, halaber, patronatuko ordezkari.
