Inflazioa lehentasun duela berretsi du Europako Banku Zentralak, eta, horregatik, bere asmoei eutsi die, eta interes tasa ofiziala puntu erdi igo du, %3tik %3,5era. Beraz, puntu laurdeneko igoera apalagoa baztertu du, aste honetan, finantza merkatuen egoera ikusita, nahiz eta halakorik eskatzen zioten ahots asko izan, uste dutenak interes tasak igotzen jarraitzeak bankuei eta finantza sistema berari kalte egin diezaiekeela.
Hori bai, Credit Suisseren egoeraren itzalpean, aurrekoetan ez bezala, Christine Lagarde EBZko presidenteak uko egin dio hurrengo bilkuretan tasen igoerarik espero daitekeen erantzuteari. «Argi daukagu epe ertainera inflazioa %2ra jaitsarazi behar dugula; hori lortzeko hartuko dugun bidea datuen araberakoa izango da. Azken egunetan finantza merkatuetan zabaldutako ziurgabetasun maila handia ikusita, ikusi behar dugu datu horiek zer dioten».
Inflazioa, «goregi» luzaz
Izan ere, batetik, martxoaren lehenean egindako banku zentralaren aurreikuspenak ditu EBZk. Haien arabera, inflazioa handia izango da luzaz eurogunean; «goregi» egongo da denbora «luzeegian». Otsailean, %8,5era jaitsi zen euroguneko inflazio tasa, energia prezio apalei esker, baina elikagaien prezioak %15 ari dira gora.
Eta azpiko inflazioa aurreikusi baino gehiago igo zen, %5,6ra. Elikagai freskoak eta energia gaiak aintzat hartzen ez dituen azpiko inflazio hori da, hain zuzen, banku zentralaren buruko min handienetako bat une honetan. «Ez dugu aurrerapen handirik ikusten azpiko inflazioaren osagaien bilakaeran», esan du Lagardek.
Tentsioei adi
Hortaz, martxo hasierako azterketari men egin dio EBZk erabakia hartzean. Bestetik, ordea, ikusteko dago —baita EBZrentzat ere— azkenean zer gertatzen den finantza merkatuetan. SVB Silicon Valley Bankekin aurrena eta Credit Suisserekin ondoren piztutako ekaitzaren inguruko kezka hor egon da, EBZko presidentearen hitzetan. Ziurgabetasun handiak daudela esan du Lagardek, banku zentrala «oso adi» dagoela finantza merkatuetako gertakariei, «ager daitezkeen tentsioei».
Aldi berean lasaitasun mezua ere eman nahi zuen, eta presidenteak azaldu du EBZk hainbat tresna eta baliabide dituela, lehen ere, frogatu dutenak baliagarriak direla. Tresna horien artean daude, besteak beste, pandemiak aktibatutako zor erosketa programa, eta fragmentazioa (herrialdeko arrisku sarien arteko desoreka) saihesteko programa, zeina irailean onartu zuen EBZk eta oraindik ez duen aktibatu.
Lagardek, era berean, ez du ikusten kontrako eraginik prezioen egonkortasuna eta finantza merkatuen egonkortasuna bilatzeko helburuen artean. «Ez dago zertan aukera egin inflazioa borrokatzearen eta finantza egonkortasunaren artean, biak dira osagarriak».
Euroguneko bankuak
Edonola ere, Lagardek ez du likidezia krisirik ikusten «une honetan». Eta uste du euroguneko bankuak askoz ere sendoago daudela 2008. urtean baino.
Luis de Guindos EBZko presidenteordeak ere ildo hori jorratu du. Tasen igoerak bankuen marjinak handitzea ere badakarrela azaldu du. Gero, azaldu du SVB bankuaren kasua oso berezia dela eta Credit Suisseri buruz, Suitzako bankuarekiko euroguneko bankuen esposizioa «mugatua» dela, eta esposizio hori ez dagoela kontzentratua banku gutxi batzuetan.
Bestela ere, banka sektorea 2008an baino askoz ere erresilienteagoa dela esplikatu du De Guindosek, kapital handiagoa dutelako orain 10-15 urte baino, eta likidezia egoerak sendoagoak direlako.
Dena den, Bloomberg webgunearen arabera, De Guindosek EBZko gobernu kideei azaldu die badaudela eurogunean banku batzuk estutasunetan egon daitezkeela interes tasen igoerekin, eta dauzkaten negozio ereduekin.
