Ukrainako gerrak eta larrialdi klimatikoak energiari buruzko gaiak lehen lerroan jarri ditu azken urtean. Euskal Herriak kanpoko energia iturriekiko duen «menpekotasunaz» jakitun, tokiko energia komunitateak bultzatzea ezinbestekoa dela uste du Udalbiltzak. Hori dela eta, gida bat osatu du herritarrentzat, enpresentzat eta udalentzat, ez soilik komunitateak sortzen laguntzeko, baita zer diren eta parte hartze prozesuak nolakoak izan behar diren azaltzeko ere.
Antzuolako (Gipuzkoa) Torresoroa aretoan aurkeztu dute gida gaur, Bernardo Kortabarria alkatearekin batera. Pili Legarra Udalbiltzako lehendakariordeak adierazi du azken urteetan energia burujabetza «iparrorratz» izan dutela azken urteetan, eta hamarkada hau «behar-beharrezkoa den eraldaketa energetikoan aurrera egiteko» gakoa izango dela gehitu du.
Aurkezpenaren ostean, mahainguru bat egin dute, energia komunitateen ideia orokorrean gehiago sakontzeko. Eztabaidan Artelaneko Oihana Loreak, Goienerreko Aitor Osak eta Xabier Zubialde ingeniariak hartu dute parte. Lehenik eta behin, hirurek garbi utzi nahi izan dute energia komunitate bat ez dela plaka fotovoltaikoen sare huts bat soilik, harago doan zerbait baizik. Gaiari «plakazentrismo» hori albo batera utzita begiratu behar zaiola dio Osak: «Europak dio irabazi interesen gainetik egon behar dutela ingurumen eta gizarte interesek, baita prozesu ireki, boluntario eta ez-diskriminatzaileak izan behar direla ere».
Energia komunitateak «edozer» izan daitezkeela adierazi du Loreak: «Komunitateak instalazio fotovoltaikoekin harremantzen dira, baina desinformazioagatik gertatzen da hori. Eguzki plaka tresna bat izan daiteke, baina ez du zertan izan behar. Udalak edo komunitateak erabaki dezake zer motako energia sortu. Plakak izan daitezke, edo ur-jauzi bat izan daiteke».
Begiak kontsumora
Energia komunitateak bultzatzeaz gain, energia kontsumoari begiratu behar zaiola ere ados daude hirurak. Zubialdek adierazi du berarentzat garrantzitsuena «energia aurreztea» dela, eta kontsumo elektrikoaz gain besteenergia kontsumo motei ere begiratu behar zaiela gehitu du; izan ere, haren esanetan, energia kontsumoaren laurdena da soilik elektrikoa.
