Literatura
Gutun Zuriak Anjel Lertxundi eta Cristina Rivera saritu ditu
Bilboko literatur jaialdiak bigarrengoz banatu ditu BBK Gutun Zuria Bilbao ohorezko sariak, euskal autoreei eta nazioartekoei aitortza adierazteko.
Bi idazle dira aurtengo BBK Gutun Zuria Bilbao ohorezko sariaren onuradunak: Anjel Lertxundi (Orio, Gipuzkoa, 1948) eta Cristina Rivera (Matamoros, Mexiko, 1964). Goizean omendu dituzte, Bilboko Azkuna zentroko atarian egindako emanaldi batean. Makila bat jaso dute biek garaikur modura, Bilboko alkate Juan Mari Aburto, BBK-ko zuzendari nagusi Gorka Martinez eta Azkuna Zentroko zuzendari Fernando Perezen eskutik.
Euskal autoreen eta nazioartekoen ibilbideari aitortza egiteko sortu zituen aipamenak Gutun Zuria Bilboko literatur jaialdiak. Iaz egin zuten estreinakoz, eta Miren Agur Meabe eta Theodor Kallifatides izan ziren saridunak.
Gaurko sari banaketan, hiribilduko alkateak xehatu ditu irabazle bakoitzaren merituak. «9.000 kilometrok baino gehiagok banatzen ditu bi artista hauek, baina gizakiaren esentziarik ezkutuenetan arakatzeko nahiak batzen ditu».
Idatzi, editatu, irakurri lelopean, martxoaren 28tik apirilaren 1era bitarte egingo dute jaialdia, eta hain zuzen ere, Lertxundik emango dio hasiera aurtengo aldiari: Lecturas de los demás, lecturas de mí mismo solasaldia eskainiko du Adan Kovacsics idazle eta itzultzaile txiletarrarekin batera.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
