Jorge Edwards idazle txiletarra hil da, 91 urterekin
Eleberriak, ipuinak eta saiakerak idatzi zituen, eta diplomazialaria ere izan zen
XX. mendeko idazle ezagunenetariko bat izan zen Edwards bere herrialdean; 50eko belaunaldia izenez ezaguna zen idazle taldearen parte izan zen. Txileko Unibertsitateko Zuzenbide Eskolan eta unibertsitate bereko Institutu Pedagogikoan ikasi zuen, eta graduondoko prestakuntza egin zuen, ondoren, Princetongo Unibertsitatean. 1973an, Pinocheten kolpe militarraren ondotik, Bartzelonan erbesteratu zen. Difusora Internacional argitaletxeko zuzendaria izan zen bertan, eta Seix Barral argitaletxean ere aritu zen, aholkulari gisa. 1994 eta 1997 artean, enbaxadorea izan zen Unescoren aurrean, Parisen. 2010ean, berriz, Txileko Gobernuaren enbaxadore izendatu zuten Parisen.
Hainbat libururen egile da. 1952an argitaratu zuen lehen ipuin liburua, El patio (Patioa). Ordea, El peso de la noche (Gauaren pisua) izan zen bere estreinako eleberria, 1965ean.
Nerudaren lagun
Pablo Nerudaren adiskide izan zen, eta hainbat obra eskaini zizkion: 1990ean Adiós poeta: Pablo Neruda y su tiempo (Agur poeta: Pablo Neruda eta haren garaia) eta 2019an, berriz, Oh, maligna (Oh, maltzurra), besteak beste. Nolanahi ere, Persona non grata (Pertsona ez atsegina) du lanik ezagunena.
Hainbat sari lortu zituen, gainera; horien artean, Cervantes saria (1999) eta Txileko Literaturako Sari Nazionala (1994). Txileko Hizkuntzaren Akademiako kide ere bazen, gainera, 1982az geroztik.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
