Altuna III.a-Tolosa 22-15 Peña II.a-Mariezkurrena II.a
Altunak eta Tolosak egin dituzte etxeko lanak
Binakako txapelketako finalean dira Laso eta Imaz, eta datorren igandean erabakiko dira beste finalistak: Altuna-Tolosa edo Elordi-Zabaleta. Kanpoan geratu dira Peña eta Mariezkurrena.
Neurketarik onena jokatu gabe, txapelketan jarraitzeko behar zuten garaipena eskuratu dute Eibarren (Gipuzkoa) Jokin Altunak eta Xabi Tolosak. Eurak izan dira bikote sendoena gaur. 22-15 irabazi dute Peña II.aren eta Mariezkurrena II.aren aurka, eta datorren astean nor baino nor ariko dira Elordi-Zabaletaren kontra; irabazten duenak jokatuko du Nafarroa Arenako finala Laso-Imazen aurka.
Boladaka jokatu dute Peñak eta Mariezkurrenak. Une eta jokaldi bikainak izan dituzte, baina hamabost galdutako egin dituzte denera. Horrela, ezinezkoa da lehiatzea. Gaizki hasi dute partida: 7-7 berdindu dute, baina hortik aurrera, lehengo lepotik burua.
Mariezkurrenaren kolpea baliatuta, partida atzean jokatzen saiatu dira urdinak, baina ondo eutsi dio gaur Tolosak. Baita fisikoki ere. Altunak ez du partidarik onena jokatu, baina nahikoa izan du aurkariak baino huts gutxiago egitearekin. Horixe aitortu du Tolosak ere partida amaitutakoan: gakoa seguru jokatzea izan dela, ahalik eta huts gutxien egitea.
Asteburuko emaitzei esker, argitu dira Binakako Txapelketako kontu gehienak. Finala jokatuko dute Lasok eta Imazek, kanpoan geratu dira Peña eta Mariezkurrena, eta datorren igandean Bilbon irabazten duena sailkatuko da finalera: Elordi-Zabaleta edo Altuna-Tolosa.
Ikusi gehiago: Labritetik joaten da Nafarroa Arenara
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
